VIKEKE, 01 Maiu 2026 (TATOLI)—Sosiedade sivíl hamutuk ho traballadór sira husi Munisípiu Vikeke destaka pontu importante hanesan hasa’e saláriu mínimu, proteje traballadór no hasa’e kapasidade traballadór, iha komemorasaun Loron Mundiál Traballadór.
“Ami rekoñese katak traballadór sira mak koluna vertebrál ba dezenvolvimentu nasaun nian. Iha oportunidade ida-ne’e, ami hakarak hato’o preokupasaun prinsipál tolu hanesan saláriu mínimu, proteje traballadór no hasa’e kapasidade traballadór sira. Traballadór sira iha nasaun ne’e servisu maka’as loron-loron, maibé sira sei moris iha difikuidade tanba kustu moris aumenta beibeik, maibé saláriu mínimu sei hela iha nivel ne’ebé la sufisiente atu suporta moris dignu família sira,” Cristina Rosawati Gusmão hateten liuhusi konferénsia imprensa ne’ebé TATOLI hala’o iha Vikeke, Sesta ne’e.
Tanba ne’e, nia husu Governu tenke halo revizaun imediata ba lei saláriu mínimu no saláriu mínimu tenke garante moris dignu ba traballadór no sira-nia família, saláriu tenke ajusta tuir kustu moris reál.
Nia hatutan traballadór sira tenke hetan vida ne’ebé dignu no justu atu promove justisa sosiál no redús dezigualdade iha sosiedade.
Notísia relevante: Komemora loron traballadór: KSTL husu Governu aprova proposta saláriu mínimu
Kona-ba kontrolu ka protesaun traballadór sira, Rosawati husu Goveru liuhusi Sekretaria Estadu Formasaun Profisionál no Empregu (SEFOPE), atu aumenta kontrolu no fiskaliza kondisaun servisu traballadór sira liuliu traballadór doméstika ka asistente uma nian, traballadór sira-ne‘ebé servisu iha negósiu ki’ik no boot, atu garante katak traballadór sira hotu hetan direitu hanesan, inklul kontratu klaru, oras servisu ne’ebé tuir lei, saláriu justu no protesaun kontra abuzu ka esplorasaun.
“Kona-ba hasa’e kapasidade treballadór sira ami mós husu Governu atu investe liután iha formasaun no treinamentu profisionál ba traballadór sira, atu sira bele hasa’e sira-nia kapasidade no kompeténsia. Ida-ne’e importante atu traballadór sira bele konkorre iha merkadu traballu iha nivel nasionál no internasionál,” nia akresenta.
Iha Loron Traballadór ida-ne’e, nia solisita hotu-hotu atu hametin solidariedade no luta hamutuk hodi defende direitu traballadór sira no direitu traballadór mak fundamentu ba dezenvolvimentu ne’ebé justu no inkluzivu.
Traballadór mak sai motór ba dezenvolvimentu
Iha parte seluk, Reprezentante Prezidente Autoridade Munisípiu Vikeke, Luís António Soares, hateten traballador sira mak sai motór ida hodi fó sira-nia vida ba dezenvolvimentu ekonomia família.
“Loron ida-ne’e fó valór ba traballadór sira-ne’ebé sai motór ba dezenvolvimentu nasaun iha Timor-Leste inklui Munisípiu Vikeke. Tanba traballadór fó sira-nia vida tomak ba dezenvolvimentu ekonomia hodi sustenta família no fó dignidade ba komunidade. Nune’e ba loron ida-ne’e, fó oportunidade ba ita hodi reflete fali katak traballadór sira-nia direitu no devér fundamentál,” Luís António hateten iha semináriu ba komemorasaun Loron Mundiál Traballadór, iha salaun Autoridade Munisípiu Vikeke.
Nia esplika traballadór sira iha direitu hanesan seguransa iha servisu fatin, direitu ba saláriu, direitu ba feriadu, maski nune’e traballadór sira tenke kontribui ba produtividade no respeita lei, regularidade sira no devér hola-parte ba dezenvolvimentu sustentablidade.
“Protesaun ba traballadór la’ós responvel Governu de’it, maibé responsabilidade koletiva. Tan ne’e, nu’udár Autoridade Munisípiu Vikeke, husu ba ita hotu tantu Governu, sosiedade sivíl no setór privadu iha Munisípiu Vikeke tenke fó prioridade hodi fortalese lei laborál no implementasaun seguransa iha servisu fatin, promove transparénsia no justisa ne’ebé relasaun ho empregu,” nia hato’o.
Iha fatin hanesan, Diretór Ezekutivu Fundasaun Knua Haberan Komunidade, Augusto Pinto, haktuir iha komemorasaun Loron Mundiál Traballadór, F-KHK ho inisiativa realiza semináriu ho tema ‘Protesaun, saúde iha servisu fatin, direitu no devér traballadór’ ba entidade sira iha Munisípiu Vikeke.
“Komemorasaun ida-ne’e ita hasoru dezafiu oioin, maibé ita iha kompromisu hodi festeja loron traballadór iha Munisípiu Vikeke. Mai ita husu parabéns ba traballadór sira iha mundu espesiál ba traballadór Munisípiu Vikeke. Dalabarak ita-nia traballadór sira halo servisu, maibé sira laiha oportunidade sira hanesan lisensa, saúde, féria no saláriu désimu terseiru, maibé iha lei traballadór traballadór sira iha direitu asesu ba oportunidade sira-ne’e,” nia subliña.
Nune’e, nia apela ba traballadór sira bainhira halo sevisu ruma tenke hatene saláriu iha kontratu husi empregadór sira.
Partisipa iha komemorasaun Loron Mundiál Traballadór ne’e kompostu husi autoridade lokál, Prezidente Kámara Komérsiu Indústria Timor-Leste (CCITL-sigla portugeza), reprezentante PNTL no traballadór sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
