DILI, 05 Maiu 2026 (TATOLI)– Tribunál Judisiál Primeira Instánsia Dili (TJPID) tuir loloos iha Tersa ne’e halo julgamentu dahuluk ba arguidu na’in-13 ne’ebé prejume ba kazu droga ne’ebé Autoridade Seguransa no komunidade intelenjénsia sira detein iha loron 12 Agostu 2022.
Hafoin Tribunál liuhusi Juíz prosesu no loke tiha audiénsia julgamentu hodi deklara tuir loos koletivu Juíz halo julgamentu ba arguidu sira maibé tanba mosu sirkustánsia balun, liliu arguidu balun auzente no koletivu Juíz balun iha relasaun família ho arguidu balun, nune’e Tribunál deside halo adiamentu ba julgamentu referida sein data.
Notísia relevante : Arguidu estranjeiru na’in-rua envolve kazu droga kumpre Prizaun Preventiva
Reprezentante Defeza husi arguidu sira, Advogadu Privadu José Pedro Camões, hateten, Tribunál halo adiamentu julgamentu tanba arguidu na’in-tolu la marka prezensa, nune’e mós Juíz iha relasaun familiar ho arguidu balun.
“Prinsípiu ha’u konkorda atu la julga uma vez iha ligasaun familia, iha koñesimentu ba faktu antes ne’e husi Juíz, nune’e hein atu relata pedidu ba Tribunál nia Konsellu Superiór mantein Juíz ne’e ou afasta husi koletivu, nune’e la prejudika kazu ne’e rasik,” Pedro Camões, hato’o ba Ajénsia TATOLI via telefónika, Tersa ne’e.
Nia esplika, lei admite bainhira hatene duni karik kazu ruma Juíz sira bele deteta katak sira iha impedimentu ou lae iha kazu ne’e.
“Juíz dehan nune’e, husu atu Konsellu Superiór Majistradu analize no dekreta, pois mak marka data foun, ne’ebé kazu ohin adia filafali sein iha data,” nia informa.
Jornalista : Natalino Costa
Editora : Julia Chatarina
