DILI, 06 Maiu 2026 (TATOLI)- Komisaun Anti Korrupsaun (KAK) liuhusi Diresaun Prevensaun Unidade Inspesaun no Monitorizasaun, kuarta ne’e, halo inspesaun ba projetu emerjénsia reabilitasaun dreinajen Mota Aitarak-Laran ne’ebé kaer husi kompañia Riri Star Unipessoal Lda.
Adjuntu Komisáriu KAK ba Servisu Apoiu no Kooperasaun, Miguel Acácio, hateten atividade ohin ne’e nu’udar atividade husi Unidade Prevensaun ninian sempre halo monitorizasaun ba projetu emerjénsia sira tuir prosesu konkursu públiku normál.
Nune’e ohin mai halo inspesaun ba projetu ne’e rasik hakarak atu hatene progresu serbisu nian tanba projetu ne’e la’o kleur ona maibé seidauk finaliza hela de’it.
“Ohin ita halo ona inspesaun problema projetu ne’e la’o tarde tanba razaun problema sosiál hanesan komunidade ne’ebé okupa área Ministériu Finansa tesik mai mota ibun ne’e seidauk rezolve no volume bee mota nian ne’ebé sempre mai boot, maibé kompañia nafatin halo serbisu,” Miguel Acácio hateten iha fatin inspesaun, mota Aitarak laran Dili.
Hafoin inspesaun KAK orienta kedas tékniku Unidade Inspesaun Verifiksaun Pagamentu husi Ministériu Obra Públika atu rezolve kedas problema sosiál no estende filafali empreza nia kontratu nune’e bele finaliza projetu ne’e ho lalais tanba husi monitorizasaun ne’e haree empreza la abandona serbisu.
Enjeñeiru husi Unidade Inspesaun Verifiksaun Pagamentu, Marcelino Soares hateten kona-ba problema sosiál ne’ebé Governu seidauk rezolve sira-nia parte sei hato’o ba ministériu nune’e bele rezolve lalais.
“Ita sei la tuur nonok maibé sei halo koordenasaun ba diresaun sira seluk hodi rezolve lalais tanba projetu ne’e rasik iha loos dalan protokolu,” nia dehan.
Tékniku Empreza Riri Unipessoal Lda, António Gomes, hateten sira-nia parte la abandona serbisu, serbisu sira ne’e la’o tarde tanba problema sosiál no volume bee ne’ebé sempre boot.
“Ami nafatin serbisu dreinajen mota ne’e parte liman loos ita finaliza ona liman karuk mak seidauk tanba problema sosiál ne’e, ita koko atu halo serbisu maibé komunidade seidauk sai entaun mákina sira tama atu halo serbisu ne’e susar,” nia dehan.
Nia serbisu iha mota laran laiha mekanizmu seluk, só hein de’it mota tún volume kiik mak foin bele serbisu.
Nia haktuir sira-nia parte asina kontratu ba projetu ne’e hahú iha loron 07 Jullu 2024 tuir planu sei ramata iha loron 0 Jullu 2025.
Maibé ho problema sosiál sira ne’e kauza seidauk finaliza kontratu mate ona iha tinan kotuk no empregu halo ona pedidu estende nian ba Ministériu Obra Públika maibé seidauk estende.
Tuir nia, projetu reabilitasaun ne’e ho totál orsamentu hamutuk $1.684.104,48, no daudaun projete ne’e rasik atinje ona 38%.
Jornalista: Arminda Fonseca
Editór: Evaristo Soares Martins
