DILI, 06 Maiu 2026 (TATOLI)- Reitór Universidade Nacional Timor Lorosa’e (UNTL), Joviano António da Costa, hamutuk ho estrutura foun UNTL nian hala’o sorumutu ho Prezidente Repúblika, José Ramos-Horta, hodi relata planu estratéjiku Universidade nian durante mandatu.
“Enkontru ne’e ko’alia mós kona-ba jestaun instituisaun nian no planu estratéjiku ba jestaun Universidade nian ba períodu tinan lima oin mai. Prezidente hanesan aman ba nasaun, ami rona mós nia hanoin balun, oinsa atu dezenvolve UNTL,” Reitór Universidade Nasionál Timor Lorosa’e (UNTL), Joviano António da Costa, hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, ohin.
Hasoru malu ne’e, nia dehan, nudar oportunidade primeiru ba estrutura foun ne’ebé foin simu pose iha fulan-tolu (3) liubá ne’e, hodi aprezenta an ba Xefe Estadu nu’udar aman ba nasaun.
”Enkontru ne’e hato’o mós ami-nia komprimentu instituisionál ba Prezidente Repúblika, katak daudaun ne’e ha’u ho ha’u-nia ekipa nu’udar jestór iha UNTL, ida-ne’e mak ami-nia objetivu prinsipál iha ami-nia sorumutu ne’e,” Joviano hateten.
Tuir nia, pontu importante ida husi diskusaun ne’e mak kona-ba kualidade edukasaun no oportunidade ba estudante sira. Prezidente Repúblika manifesta intensaun hodi fó apoiu finanséiru ba bolsa estudu ba estudante UNTL sira.
”Prezidente apoiu. Primeiru mak hakarak ajudu finanséiru liga ba bolseiru ba estudante UNTL, maibé ninia mekanizmu depois ami sei planeia, sei diskute iha nível universitáriu depois liga mai prezidente. Maibé prezidente ninia pedidu mak ne’e, tenke aselera lalais para bele kanaliza ajudu ne’e rasik ba iha UNTL,” nia dehan.
Durante enkontru, Xefe Estadu mós enkoraja jestór UNTL sira katak kualkér atividade ka planu institusionál ne’ebé sei hala’o ho instituisaun Estadu seluk, hodi asegura programa universidade nian bele la’o ho susesu.
Jornalista : Hortêncio Sanchez
Editór : Cancio Ximenes
