VIKEKE, 07 Maiu 2026 (TATOLI)—Administradór Postu Administrativu Uatukarbau, Munisípiu Vikeke, Anacleto Doutel Sarmento, husu Governu dezenvolve bee-matan Irabere sai fatin turizmu tanba Irabere nu’udár turizmu naturál.
Notísia relevante: https://tatoli.tl/2021/11/10/autoridade-uatucarbau-husu-governu-dezenvolve-mota-irabera-sai-turizmu-komunitariu/
“Ami komunidade Postu Uatukarbau hakarak husu Governu no Estadu dezenvolve ami-nia bee Irabere sai rekursu ba tuirizmu iha Timor-Leste, espesiál ba ami Uatukarbau hodi fó benefísiu (rendimenu) ekonomia ba ami,” Ancleto Dautel hateten ba TATOLI iha Postu Uatukarbau, Kinta ne’e.
Autoridade ne’e haktuir bee Irrabere kada tinan vizitór lokál no internasionál mai vizita beibeik, maibé fasilidade sira iha iha bee-matan referidu seidauk eziste, entaun sai dezafiu ida ba vizitante sira.
“Tan ne’e, presiza dezenvolve no kria fasilidade sira iha bee matan, atu atrai vizitór turizmu sira tantu lokál no internasionál. Kuandu sítiu turizmu ida-ne’e mak ita dezenvolve ona sai mós fonte rendimentu ida ba Munisípiu Vikeke,” nia subliña.
Anacleto informa, problema seluk mak estrada liga ba Irabere, Suku Irabin de Cima ho kondisaun grave hodi difikulta vizitór sira vizita fatin ne’e.
“Presiza mós reabilita estrada sira-ne’e, atu vizitór sira hakarak vizita bee-matan Irabere karik labele iha difikuldade,” nia tenik.
Jornalista: Vitorino Lopes da Costa
Editór: Xisto Freitas da Piedade
