DILI, 07 Maiu 2026 (TATOLI)—Governu liuhusi Ministériu Obra Públika (MOP) hala’o enkontru ho setór privadu sira atu reorganiza no rona difikuldade ne’ebé durante ne’e sira hasoru iha terrenu.
Ministru Obra Públika, Samuel Marçal, hateten ohin Ministériu bolu setór privadu hodi reorganiza fali setór privadu sira tanba sai parseria importante ba Governu iha implementasaun infraetrutura nian maske sira hasoru difikuldade iha terenu.
“Objetivu enkontru ne’e atu rona kona-ba difikuldade ne’ebé setór privadu sira hasoru hodi abandona servisu no prolonga durasaun termu kontratu iha terrenu, entaun oinsá ita buka solusaun hodi aselera dezenvolvimentu infraestrutura,” Ministru Samuel informa ba jornalista sira iha nia kna’ar fatin, Kaikoli, ohin.
Governante ne’e dehan, kona-ba abandona projetu ne’e iha ninia implikasaun barak balun tanba problema sosiál, finanseiru no ekipamentu, ne’e sei iha alternativa seluk.
Maibé, nia dehan, karik empreza sira mak abandona servisu tuir sira-nia hakarak ne’e, Governu laiha toleránsia maibé sei hapara kontratu no sei hasai sira husi lista (black list).
“Projetu balun la’o kle’ur tanba klima no problema sosiál ne’ebé mosu impedimentu iha terrenu liuliu komunidade afetadu sira-ne’ebé balun lakohi koopera, maibé hakarak ka lakohi servisu tenke kontinua la’o,” nia esplika.
Nia hatutan, pontu importante liu iha enkontru ne’e mak difikuldade ba presu kombustível no laiha alkatraun, entaun Ministériu sei haree asuntu ne’e hodi ko’alia ho Primeiru-Ministru atu buka alternativa, tanba Governu ho setór privadu tenke kompleta malu signifika setór privadu servisu ninian no Governu mós tenke hala’o ninia servisu.
“Entaun, ita hein Primeiru-Ministru fila husi rai-li’ur mak ita sei levanta problema ne’e atu buka solusaun,” nia dehan.
Enkuantu, marta marka prezensa iha enkontru referida mak MInistru Obra Públika, Samuel Marçal, SEATOU, Germano Santa Brites, Prezidente CCITL, Jorge Serano, kargu xefia sira no setór privadu na’in-20.
Jornalista : Alexandra da Costa
Editór : Cancio Ximenes
