DILI, 07 Maiu 2026(TATOLI)–Prezidente Tribunál Rekursu, Afonso Carmona, hateten, durante ne’e julgamentu ba Tribunál Móvel la’o hanesan baibain.
“Julgamentu ba Tribunál Móvel iha área juridisaun Tribunál Dili, Baukau, Suai no Oekusi to’o agora kontinua la’o nafatin. Iha semana kotuk juíz sira iha Tribunál Suai no Dili halo hela julgamentu Tribunál Móvel,” Prezidente Tribunál Rekursu, Afonso Carmona, hato’o ba Jornalista sira iha ninia knaar fatin, Kaikoli, Kinta ne’e.
Nia dehan, objetivu Tribunál Móvel atu lori besik justisa ba povu.
“Ita kontinua fó asisténsia justisa ba povu, tanba ne’e ho prezensa Tribunál Móvel atu lori justisa besik liu ba povu,” nia akresenta.
Notísia relevante : Tribunál Dili hahú reativa hikas Tribunál Movel
Nia hatutan, Juiz sira ofisiál justisa ba nafatin realiza julgamentu movél.
“La’ós tanba osan mak ita bá serbisu, lae,! ita-nia serbisu ba povu, ba justisa ne’e prioridade,” nia afirma.
Tuir IX Governu nia programa, iha parte setór justisa nian númeru dalimak deskreve katak relasiona ho asesu ba justisa sei fomenta aprosimasaun husi justisa ba sidadaun no atu ida ne’e akontese, sei halo :
- Asegura kapasidade servisu prisionál nian hodi garante seguransa no melloria iha instalasaun prisionál, kumprimentu ba norma internasionál sira no ba reintegrasaun prizioneiru nian iha komunidade liuhusi estabelesimentu ba Sentru Reintegrasaun;
- Hadi’a kapasidade servisu rejistu no notariadu hodi garante seguransa ba komérsiu jurídiku no asegura katak atus ezekuta duni ho lalais no bele iha asesu ba sidadadaun;
- Hadi’a efikásia iha jestaun ba kadastru terras no patrimóniu imobiliáriu Estadu nian;
- Kontinua implementa prosesu atu haluan emisaun billete identidade ba munisípiu sira hotu, no kontinua investe iha emisaun Pasaporte Eletróniku Timor-Leste nian;
- Kria no dezenvolve sistema emisaun Kartaun Identifikasaun Úniku ba sidadaun hotu-hotu ne’ebé atinje ona maioridade;
- Expande programa Klínika Asesu ba Justisa, liuhusi koordenasaun ho programa Janela Únika husi setór ekonomia nian, hodi abranje munisípiu sira hotu;
- Revee mapa setór justisa nian no implementa medidas atu bele garante, iha futuru, prezensa judisiál, ho kualidade no profisionalizmu iha munisípiu sira hotu;
- Hala’o kampaña boot atu divulga sistema justisa, leis no direitu fundamentál sidadaun nian hodi kria konfiansa ba sistema justisa no asegura kompreensaun ne’ebé di’ak kona-ba ‘justisa ba ema hotu’;
- Kontinua disemina (ka halo sosializasaun) ba leis, dekretu-leis no diploma legál atu aumenta koñesimentu husi sidadaun.
Jornalista : Natalino Costa
Editora : Julia Chatarina
