VIKEKE, 08 Maiu 2026 (TATOLI)—Xefe Aldeia Loko-Loko, Suku Matahoi, Postu Uatulari, Munisípiu Vikeke, Luís Miguel, informa abitante sira husi área Loko-Loko daudaun ne’e asesu ona eletrisidade husi Eletrisidade de Timor-Leste, Empreza Públika (EDTL, E.P.).
“Ami hela iha área Loko-Loko no Levadae husi Suku Matahoi dezde tinan naruk iha-ne’e ona, maibé la asesu ba eletrisidade. Iha tempu kalan ami sunu lampurina no lilin. Durante ne’e, ami husu beibeik ba Governu tanba ne’e mak agora ami asesu ona eletrisidade. Iha Kuarta, 06 Maiu, EDTL Munisípiu Vikeke halo lakan ona eletrisidade nune’e daudaun ne’e asesu ona enerjia eletrisidade,” Luís Miguel ba TATOLI iha Postu Uatulari, Sesta ne’e.
Tan ne’e, nia hato’o agradesimentu ba Governu liuhusi EDTL, E.P. ne’ebé durante ne’e halo esforsu instala eletrisidade.
Notísia relevante: EDTL distribui ona fiu eletrisidade ba Aldeia Loko-Loko
“Ami sente orgullu tebes tanba asesu ona liña eletrisidade hodi ajuda ona ami iha tempu kalan no labarik estudante sira estuda mós di’ak ona, lahanesan ona tempu uluk,” nia haktuir.
Iha fatin ketak, reprezentante juventude Aldeia Loko-Loko, Manuel dos Santos, hateten asesu ona eletrisidade ne’e sei fó benefísiu ba povu tanba túr ona iha naroman.
“Sei la difikulta ona ami-nia alin no oan sira-nia estuda iha tempu kalan. Alende ne’e, fó mós benefísiu ba komunidade vendedór sira bele utiliza jeleira no sasán eletronika sira seluk. Ami mós bele asseu ona informasaun relevánsia sira liuhusi kanál televizaun,” nia espresa.
Entretantu, implementasaun Projetu Eletrisidade Komunitária (PEK) hahú iha tinan 2023 ne’ebé implementa husi EDTL no servisu hamutuk ho komunidade Aldeia Loko-Loko ho totál uma-kain hamutuk 124.
Jornalista: Vitorino Lopes da Costa
Editór: Xisto Freitas da Piedade
