DILI, 08 Maiu 2026 (TATOLI)—Primeiru-Ministru, Kay Rala Xanana Gusmão, hamutuk ho delgasaun to’o iha Cebu-Filipina iha Kinta (07 Maiu 2026) hodi partisipa Simeira Asosiasaun Nasaun Sudeste Aziátiku (ASEAN, sigla inglés) ba da-48.
Hafoin Primeiru-Ministru, Kayrala Xanana Gusmão ho delegasaun to’o iha aeroportu internasionál Cebu simu ofisiál husi Embaixadór Timor-Leste iha Filipina, Marciano Gracia da Silva ho Primeiru Sekretáriu husi Ministériu Negósiu Estranjeiru no Kooperasaun (MNEK), Pedro Laranjeira inklui ofisiál Governu lokál nian.
Timor-Leste partisipa simeira ba dahuluk hafoin ofisialmente adere nu’udár membru plenu ASEAN ba da-11 iha fulan-Outubru 2025, entaun iha simeira ASEAN ba da-48 ne’e partisipa mós husi Xefe Estadu no Xefe Governu sira husi nasaun membru ASEAN nian.
Fó lembra katak antes ne’e iha 21 Janeiru 2026, Vise Ministra ba Asuntu ASEAN, Milena Maria da Costa Rangel, aprezenta Timor-Leste atu partisipa reuniaun ASEAN SOM ka sorumutu funsionáriu importante ASEAN iha iha Cebu, Filipina, ba Governu liuhusi reuniaun Konsellu Ministru, kuarta ne’e.
“Ne’ebé MNEK ohin mak foin hetan tempu hodi halo aprezentasaun tanba ha’u ho ministru sei ba tuir enkontru iha Filipina. Hanesan iha semana kotuk mós MCI mak aprezenta inklui MTK”, Vise Ministra ASEAN informa ba jornalista sira.
Enkuantu tuir dokumentu ofisiál define katak aprezentasaun ne’e foka ba tema prinsipál sira-ne’ebé sei diskute iha sorumutu sira-ne’ebé temi ona, ho destaka ba prioridade sira husi Prezidénsia ASEAN Filipina nian ba tinan 2026.
Akompaña ba desizaun sira husi Simeira ASEAN foin lalais ne’e no análize husi relasaun esterna organizasaun nian, nomós kestaun rejionál no internasionál sira-neʼebé fó impaktu ba dame, seguransa estabilidade rejionál.
Kona-ba Timor-Leste, subliña katak enkontru sira-ne’e importante tebes iha kontestu pós- adezaun, hodi marka tranzisaun ba partisipasaun ida-ne’ebé plena no ativa iha ASEAN nia laran.
Enkuantu iha serimónia bem-vindu husi guarda ondra akompaña ho dansa kulturál Cebu nian, no hananu múzika Timor nian “Kolelele mai”. Atividade simeira ASEAN ne’e hala’o durante loron tolu hahú husi 06-08 fulan-Maiu 2026.
Jornalista : Alexandra da Costa
Editór : Cancio Ximenes
