BAUKAU, 18 Maiu 2026 (TATOLI)—Konsellu Munisipál Kombatente Libertasaun Nasionál (CMCLN-sigla portugeza) husu Estadu atu hahú fó prioridade ba jerasaun foun tanba atu iha futuru bele liberta povu husi mukit no ki’ak.
Sekretáriu Jerál CMCLN Baukau, Roberto Carlos da Costa ‘Laran Taridu’, esplika selebrasaun Loron Restaurasaun Independénsia RDTL ba da-XXIV ona Timor-Leste presiza halo reflesaun envolve entidade hotu ba konstrusaun Estadu liuliu hametin governasaun ne’ebé foku ba liberta povu ne’ebé kuaze tinan 24 ukun-an sei kontinua moris iha mukit.
“Estadu tenke tau-atensaun ona ba jerasaun kontinuadora liuliu prepara kondisaun ne’ebé di’ak nune’e futuru kontinua obra lutadór sira-nian,” Roberto da Costa informa ba TATOLI iha ninia kna’ar fatin, Vila Antiga, Segunda ne’e.
Laran Taridu relata kondisaun ne’ebé prepara ba jerasaun kontinuadora mak presiza espasu ba edukasaun ne’ebé konsideradu nu’udár xave ba libertasaun povu hanesan bolsa estudu no sistema edukasaun ne’ebé orienta ba karakter inklui akadémiku.
Aleinde ne’e, Estadu presiza kontinua tau-atensaun ba veteranu kombatente iha asuntu saúde iha-ne’ebé kada tinan menus ba bebeik nune’e presiza fasilita médika ne’ebé adekuadu hodi hanaruk vida tanba konsideradu importante ba konstrusaun Estadu.
“Veteranu tenke iha hanoin katak unidade importante, labele haketak malu liuhusi kór ka grupu maibé tenke iha papél atu asegura Estadu nune’e kontinua liberta povu husi mukit no ki’ak,” Roberto subliña.
Entretantu, selebrasaun Loron Restaurasaun Independénsia ba da-XXIV ne’ebé ho tema “Hamutuk ita harii pátria ida-ne’ebé justa, inkluziva no reziliénte” iha Munisípiu Baukau realiza ho atividade limpeza jerál, jogu tradisionál futu manu, misa agradesimentu no isár bandeira ne’ebé sei realiza iha resintu Administrasaun Munisipál Vila Nova.
Jornalista: Natalino Belo
Editór: Xisto Freitas da Piedade
