DILI, 19 Maiu 2026 (TATOLI)—Estudante hosi Fakuldade Siénsia Edukasaun, Departamentu Lian Inglés hosi Universidade Orientál Timor Lorosa’e (UNITAL), halo asaun limpeza iha Jardín Motael.
“Asaun limpeza ne’e nu’udár kontribuisaun hosi estudante UNITAL hodi komemora mós Loron Restaurasaun Independénsia ba da-XXIV ne’ebé selebra aban (20/05/2026),” Honório Martins Soares nu’udár estudante voluntáriu dehan ba TATOLI, Tersa ne’e.
Tuir nia, nu’udár estudante iha devér morál hodi kontribui ba ambiente moos no saudável, ema hotu hamutuk hodi hamoos sidade Dili.
Honório Martins Soares husu ba Governu atu kria kondisaun lixeira ne’ebé adekuada hodi labele soe fo’er arbiru ne’ebé bele fó impaktu ba saúde komunidade nian.
“Ami husi estudante, rona kona-ba Governu, ami sente dehan kria lixeira sira hodi labele soe fo’er iha fatin-fatin, kria buat ne’ebé posibilidade ba komunidade atu iha konxiénsia,” Honório hateten.
Nia subliña, nu’udár nasaun ida-ne’ebé dezenvolvida, presiza tebes kolaborasaun no kontribuisaun hosi parte hotu, inklui mós husi parte estudante sira-nian liuhusi asaun limpeza jerál hodi kontribui ba Loron Restaurasaun Independénsia nian.
Reprezentante estudante ne’e mós prefere komunidade hotu atu labele soe fo’er arbiru hodi prevene moras no mantein sidade Dili moos.
“Ha’u-nia sujestaun ba komunidade ne’ebé hela iha Dili, kuandu ita-nia nasaun Timor-Leste mantein ambiente moos, presiza iha konxiénsia rasik atu labele soe lixu arbiru tanba ne’e bele prejudika ba ita-nia saúde,” nia hateten.
Enkuantu, estudante Aurélia de Jesus Freitas, haktuir objetivu husi asaun limpeza mak atu mantein ambiente moos, saudavel no livre husi lixu.
“Governu presiza halo lei no programa atu kontrola lixu, fornese fatin lixu, aumenta edukasaun ba komunidade, garante ambiente moos no saudável,” nia dehan.
Jornalista: Osória Marques
Editór: Xisto Freitas da Piedade
