DILI, 19 Maiu 2026 (TATOLI)—Ministra Saúde, Elia dos Reis Amaral, husu profisionál saúde sira atu servisu ho profesionál atu halo atendimentu di’ak ba pasente sira.
Ministra Elia hato’o kestaun ne’e relasional ho komemorasaun loron restaurasaun independénsia RDTL ba da-24 ne’ebé sei selebra iha 20 Maiu iha Tasi-Tolu.
“Husu mós ba profisionál saúde sira, no ita agradese ba loron independensia ba da-24, maibé oinsá ita bele esforsu liutan ho sentidu nasionálizmu atu halo atende ho fuan nafatin no servisu nafatin ba ita-nia povu labele iha área nasionál de’it maibé ita presiza mós tau matan ba sira-ne’ebé mak iha área remota. Liliu sira-ne’ebé mak daudaun ne’e ita halo hela pakote integradu saúde,” Ministra Élia dos Reis Amaral dehan ba jornalista sira banhira ramata misa agradesimentu ba loron restaurasaun independénsia ba da-24 iha Igreja Katedrál, ohin.
Nia hatutan, atividade pakote integradu saúde ne’e depende ba mapeamemtu ne’ebé mak sentru saúde ida-idak koloka ba.
“Atividade ne’e la’o hela depende ba ajendamentun ne’ebé mak sentru saúde koloka ba. Maibé iha dezafiu mak ita presiza atu kuidadu saúde primaria no oinsá mak ita atu kuidadu saúde sekundaria no terseira ida mak ita presiza atu kompleta tan ba oin,” nia hateten.
Jornalista : Felicidade Ximenes
Editór : Cancio Ximenes
