OEKUSI, 25 Maiu 2026 (TATOLI) – Ministériu Edukasaun (ME) liuhusi Institutu Nasionál Formasaun Dosente no Profisionál Edukasaun (INFORDEPE), serbisu hamutuk ho Komisaun Nasionál Timor-Leste ba UNESCO (KNTLU), disemina kuadru kompeténsia ba manorin iha Rejiaun Administrativa Espesiál Oekusi Ambeno (RAEOA) hodi garante kualidade edukasaun liuhusi ensinu aprendizajen.
Xefe Departamentu Formasaun iha INFORDEPE, Agostu da Conceição Sarmento Pinto, esplika, kuadru kompeténsia ne’ebé introdús ba manorin sira maka domina língua ofisiál tetun no portugés, domina sentidu sientífiku no kurríkulu, metodolojia ensinu ba labarik sira tenke uza metodolojia sekulu XXI nian, inklui etika profesionál no kolaborasaun ho komunidade sira.
“Kompeténsia manorin ne’e, nanis ona iha lei baze edukasaun (LEI N.º 14/2008 de 29 de Outubro – red), maibé, nia implementasaun maka durante ne’e, la’o ladún rigór, tanba ne’e maka Ministériu Edukasaun liuhusi INFORDEPE kolabora hamutuk ho UNESCO halo diseminasaun ba manorin sira kobre munisípiu hitu iha territóriu nasionál,” nia hateten iha Salaun INFORDEPE Oekusi.
Lei N.º 14/2008 ne’e mak “baze” hodi organiza oinsá labarik no foin-sa’e iha Timor-Leste bele asesu ba eskola husi ki’ik to’o boot, hodi garante sira-nia direitu, define lian ne’ebé uza, no oinsá governu tenke jere kualidade edukasaun nian.
Notísia relevante:Ministra destaka importánsia kuadru kompeténsia ba profesór
Responsavel Formasaun ne’e informa, durante ne’e parte ministériu hala’o ona avaliasaun, hatudu katak, embora kuadru kompeténsia ne’e, manorin sira balun hatene, maibé iha implementasaun seidauk másima, entaun presiza mai enfaze ba dirijente ida-idak atu konsidera nune’e hamutuk ho manorin sira, atu bele aplika iha eskola ho rigór.
Nia hateteten, alvu ba disemina mai husi adjuntu eskola sira, manorin feto potensiál no manorin espertu sira, ho totál partisipante ema na’in-50, ne’ebé hakna’ar an iha Ensinu Pré-Eskolár (EPE), Ensinu Báziku filiál (EBF) no Ensinu Báziku Sentrál (EBC).
“Atividade fazeadamente, agora foin hala’o, maibé ba oin, ami sei kontinua desiminasaun ne’e, ba to’o manorin hothotu iha eskola ida-idak, maibé formandu 50 ne’e, hetan ona matéria bainhira fila ba sira-nia eskola, sei transmite tutan, ba maluk manorin sira seluk,” nia informa.
Notísia relevante:ME reforsa kuadru kompeténsia ba manorin sira hodi hasa’e kualidade edukasaun
Iha biban ne’e, formandu Jaime Jorge Marçal, husi EBC Haobeno sub-rejiaun Nítibe, agradese tanba nu’udar manorin presiza iha formasaun, atu bele apoiu profesór sira-nia koñesimentu hodi aplika iha baze, nune’e mellora prosesu avaliasaun ba estudante, no dirijente sira bele avalia manorin sira ba dezempeñu kada tinan.
“Formasaun ne’e importante atu eleva ami-nia koñesimentu nu’udar profesór, sei prende didi’ak kuadru kompeténsia ne’e, maka oinsa bele aplika iha baze, hodi hasa’e koñesimentu ba estudante sira. Tanba, profesór iha ninia kna’ar hodi oinsá bele halo aváliasaun ba estudante sira ho didi’ak no profesionál, bazeia ba kuadru kompeténsia nian,” nia hateten.
Jornalista: Abílio Elo Nini
Editór: Rafael Ximenes de A. Belo
