VIKEKE, 26 Maiu 2026 (TATOLI)—Ekipa Komisaun Funsaun Públika (KFP) disemina Dekretu-Lei Nú. 84/2023 kona-ba desentralizasaun administrativa ba funsionáriu sira iha Munisípiu Vikeke hodi hasa’e funsinonáriu sira-nia koñesimentu.
Iha aprezentasaun ne’e, Komisáriu Komisaun Funsaun Públika (KFP) ba Asuntu Pensaun no Reforma, Jorge Paiva Araújo, haktuir atividade diseminasaun ne’ebé ekipa integrada hala’o iha tinan 2026 ne’e, parte husi planu anuál KFP nian hodi sai sentru kontrolu ba mákina Estadu iha Timor-Leste, hodi hatán ba kualidade rekursu umanu iha servisu administrasaun públika.
“Matéria ne’ebé disemina ne’e foka liubá lei, dekretu-lei, diploma ministeriál no prosedimentu sira ba kargu xefia no funsionáriu sira iha munisípiu ida-ne’e atu sai hanesan bukae ba funsionáriu sira hodi organiza no regula funsionáriu públiku sira atu la’o tuir korridór governasaun di’ak nian. Tanba ne’e, ha’u fó hanoin katak nu’udár servidór Estadu, tenke fó asesoria no servisu ne’ebé kualidade ba administrasaun públika no labele iha intervensaun polítika ruma,”
Jorge Paiva Araújo hateten iha abertura diseminasaun iha Salaun Administrasaun Munisipál Vikeke, Tersa ne’e.
Aleinde ne’e, reprezentante Prezidente Autoridade Munisípiu Vikeke, Luís António da Silva Soares, husu funsionáriu sira atu partisipa ho másima atividade ne’e, atu kontinua hasa’e koñesimentu kona-ba lei, dekretu-lei no prosedimentu administrasaun públika ne’ebé formadór sira oferese, sei sai matadalan ida hodi fó atendimentu ne’ebé di’ak ba públiku ho prinsípiu boa-governasaun.
“Ida-ne’e mós hanesan parte ida husi ita-nia preparasaun ba implementasaun polítika desentralizasaun podér lokál iha servisu administrasaun públika Vikeke nian,” nia subliña.
Matéria ba diseminasaun kompostu husi Dekretu-Lei Nu. 84/2023 kona-ba Desentralizasaun Administrativa, Importánsia Aplikasaun Kontrolu Internu Institusionál (IJE), Jestaun Finansa Públika (Siklu Prosesu Ezekusaun Orsamentu), Roteiru Prosesu Disiplinár no Manuál Asédiu Seksuál (Chatbot Rosa).
Diseminasaun ne’e hetan partisipa husi kargu diresaun xefia, funsionárius husi ministériu no instituisaun Governu sira hamutuk na’in-94 kompostu husi feto na’in-8 no mane na’in- 86.
Jornalista: Vitorino Lopes da Costa
Editór: Xisto Freitas da Piedade
