DILI, 26 Maiu 2026 (TATOLI)—Primeiru-Ministru, Kay Rala Xanana Gusmão, konsidera Planu Estratéjiku Dezenvolvimentu Nasionál (PEDN) ladun iha progresu tanba Governu laiha vizaun ne’ebé konkretu atu implementa.
Notísia Relevante: MPIE aprezenta relatóriu monitorizasaun PEDN 2011-2030 ba KM
Primeiru-Ministru, Kay Rala Xanana Gusmão, hateten durante tinan 24 Timor-Leste ukun-an ne’e halo ona saida taba iha Governu da-IV hamosu PEDN 2011 to’o 2030, iha setór balun la’o, balun on going, balun la la’o, balun foin mak atu hahú maibé uitoan de’it mak iha mudansa, ne’e tanba laiha vizaun.
“Governu ida simu responsabilidade maibé laiha vizaun ne’e hanesan de’it tanba laiha programa ida atu implementa. Hanesan seidauk identifika rekursu loloos maibé hakarak implementa de’it ona,” Primeiru-Ministru deklara iha diskursu hafoin partisipa iha abertura KKT iha JL World, áreia branka, ohin.
Xefe Governu dehan, entaun ida -e’e mak komanda tanba durante tinan 24 Timor-Leste ukun-an mós seidauk halo buat hotu tanba paradu iha buat barak.
“Hanesan ohin ha’u temi ba Governu karik tenke iha vizaun ida no iha vizaun tenke koñese realidade tomak ne’ebé presiza no ida-ne’ebé mak sai prioridade,” nia esplika.
Nune’e, nia dehan, buat importante tebes ida iha rezisténsia nia laran krítika no auto-krítika, dalaruma ema krítika dehan kala sira hirus malu maibé bainhira ema krítika ho laran tomak ne’e, tenke simu hodi halo di’ak.
Antes ne’e, Governu Konstitusionál da-sia (IX) hakarak atu halo avaliasaun no revizaun ba PED 2011-2030 no promove realizasaun PED foun ba tinan 2026-2035.
Haree ba kompleksidade atu halo revizaun ba PED no dezenvolve kontribuisaun foun ba meta tinan 10 nian, kontrata espesialista ne’ebé hanesan hodi dezenvolve planu estratéjiku atuál ne’e justifika ona, nune’e garante kontinuidade prosesu no seleridade no efisiénsia boot liu iha ninia revizaun.
Empreza PT Meridian Kreatama Mandiri no KIAT, Lda, ne’ebé ninia sede iha sudeste aziátiku, iha esperiénsia barak hodi halo sira sai empreza únika ne’ebé aprezenta kondisaun hodi hala’o projetu ida-ne’e, ne’ebé ninia valór prevee besik $784.368.
Notísia Relevante: Governu kontrata empreza rua iha futuru ba revizaun PED 2011-2030
Jornalista : Alexandra da Costa
Editór : Cancio Ximenes
