DILI, 04 Agostu 2025 (TATOLI)—Governu liuhusi reuniaun Konsellu Ministru (KM) estraordinária, Segunda ne’e, aprova projetu deliberasaun ida ne’ebé aprezenta husi Ministru Planeamentu no Investimentu Estratéjiku, Gastão de Sousa.
Projetu deliberasaun ne’e kona-ba kontratasaun iha futuru liuhusi ajusta direitu empreza PT. Merdiana Kreatama Mandiri hodi serbisu hamutuk ho empreza KIAT, Lda hodi revee Planu Estratéjiku Dezenvolvimentu (PED) 2011-2030
Ministru Gastão de Sousa, hateten, aprezentasaun diploma ne’e ho objetivu atu asina kontratu ida atu halo avaliasaun ba PEDN 2011-2030 nia progresu atinjimentu.
“Ita haree lakuna saida no prepara fali planu médiu prazu ida para haree ba ezekusaun husi 2026- 2035 ba tinan 10 nian, entaun planu médiu prazu atu halo avaliasaun no elabora ba planu estratejiku dezenvolvimentu,” Ministru informa ba jornalista hafoin ramata reuniaun ezekutivu, iha Palásiu Governu.
Notísia relevante : Governu tenke fó prioridade ba setór edukasaun iha programa PEDN
IX Governu Konstitusionál hakarak atu halo avaliasaun no revizaun ba PED 2011-2030 no promove realizasaun PED foun ba tinan 2026-2035.
Haree ba kompleksidade atu halo revizaun ba PED no dezenvolve kontribuisaun foun ba meta tinan 10 nian, kontrata espesialista ne’ebé hanesan hodi dezenvolve planu estratéjiku atuál ne’e justifika ona, nune’e garante kontinuidade prosesu no seleridade no efisiénsia boot liu iha ninia revizaun.
Empreza PT Meridian Kreatama Mandiri no KIAT, Lda, ne’ebé ninia sede iha sudeste aziátiku, iha esperiénsia barak hodi halo sira sai empreza únika ne’ebé aprezenta kondisaun hodi hala’o projetu ida-ne’e, ne’ebé ninia valór prevee besik $784.368.
Jornalista : Alexandra da Costa
Editoira : Julia Chatarina
