DILI, 28 Maiu 2026 (TATOLI)—Ministra Saúde, Élia dos Reis Amaral, rekoñese edifísiu pediatria andar lima iha Hospitál Nasionál Guido Valadares ne’e, empreza CCECC seidauk bele entrega ba Governu tanba tékniku sira husu atu hadi’a tan kondisaun balun.
Notísia Relevante: HNGV sei rekruta profisionál saúde 400-resin servisu iha edifísiu pediatria andar lima
“Antes ne’e, ha’u dehan sei entrega iha fulan-Maiu. Maibé, ha’u halo vizita fila-fali iha fulan Maiu nia laran, empreza sei hadi’a tan kondisaun balun. Signifika sei dada uitoan ba inaugurasaun ne’e,” Ministra Saúde, Élia dos Reis Amaral, hateten ba jornalista sira hafoin partisipa debate Orsamentu Retifikativu iha PN, ohin.
Maske nune’e, nia dehan, Ministériu Saúde garantia katak iha tinan ida-ne’e empreza sei entrega konstrusaun edifísiu pediatria andar lima iha HNGV ba Governu, tanba konstrusaun refere daudaun ne’e atinje ona 86%.
Antes ne’e, Diretor Servisu Apoiu Diagnóstiku no Terapeutiku iha HNGV, Vidal de Jesus Lopes hateten, edifísiu pediatria andar lima iha HNGV ne’e iha tempu besik sei entrega ba Governu.
“Ita hein lai ekipamentu non médiku no médiku instala ona ne’e mak foin halo inaugurasaun dala ida. La’ós edifisiu de’it maibé instalasaun iha laran ne’e prontu ona foin inaugura, hafoin entrega ba HNGV,” nia hateten.
Kona-ba ekipamentu, daudaun ne’e prosesu iha aprovizionamentu la’o hela no hein lori tama ba edifísiu nia laran, maibé presiza ema téniku sira mak atu instala ekipa hirak ne’e.
“Ita hein de’it banhira mak empreza entrega tanba uluk ita dehan Junu ou Jullu, maibé ita konsistente nafatin. Karik, iha asuntu tékniku ruma mak demora uitoan mak bele ramata iha inisiu fulan-Agostu,” nia dehan.
Notísia Relevante: Konstrusaun edifísiu pediatria andar lima iha HNGV atinje ona 86%
Jornalista : Felicidade Ximenes
Editór : Cancio Ximenes
