DILI, 29 Maiu 2026 (TATOLI)—Ekipa Caesardante FC manán Boa Sorte ho rezultadu 4-2 iha jogu kontinuasaun Asosiasaun Futsál Timor-Leste (AFTL) époka 2026, ne’ebé realiza iha kampu futsál FALINTIL-Forsa Defeza Timor-Leste (F-FDTL) Fatuhada, Dili, sesta kalan.
Hanesan kultura iha mundu futeból nian tantu iha salaun no kampu boot, bainhira árbitru sira hahú fó orden, jogadór sira lansa kedan kontra no atake ba malu tuir tékniku no abilidade ekipa ida-idak nian.
Caesardante hahú jogu hanesan rusa fuik ne’ebé halai lais liu, iha ne’ebé jogadór Denilson Migato marka golu ho lais liu iha minutu 11 hodi muda rezultadu ba 1-0. Boa Sorte la nonook maibé lansa atake hasoru Caesardante, maibé atake hirak ne’e hela de’it hanesan atake, basá defeza Caesardante hanesan moru proetsaun ne’ebé proteje metin ninia guarda rede atu rede labele naklees lalais.
Adeptu sira animadu liu bainhira bola iha Caesardante nia ain, jogadór sira sólidu, ka’er bola ho kuidadu, kontrola malu di’ak, ikus iha minutu 14, jogadór Caesardante Alexander da Cruz marka golu daruak hodi muda rezultadu ba 2-0.
Jogu sai manas liután husi minutu ba minutu, Boa Sorte esforsu maka’as oinsá atu rekupera golu, maibé seidauk iha oportunidade to’o minutu ikus primeira parte termina. Ho nune’e Caesardante lidera ho rezultadu provizóriu 2-0.
Dolar ba segunda parte, ekipa rua kontinua lansa kontra no atake ba malu. Boa Sorte tenta muda estratejia, halo jogu sai animadu liután, ho nune’e iha minutu 22 jogadór Yuan Fredik responde ona golu ida hodi muda rezultadu nakfilak ba 1-2, Jogu hetok rame liután, basá moru proetsaun husi Caesardante naksobu ba daudaun.
Jogadór Caesardante nafatin kombina malu joga ho kuidadu, maibé nafatin rona orientasaun husi treinadór, Boa Sorte mós hanesan hodi hadau malu kontinua joga ho kalma maibé rona ba orientasaun treinadór nian.
Boa Sorte lansa atake barak oinsá muda rezultadu ba empata, maibé labele tanba Caesardante hamate tutuir Boa Sorte nia golu, nune’e iha minutu 27 Ivanildo Gonçalves marka tan golu ida hodi muda rezultadu ba 3-1.
Boa Sorte la lakon esperansa, kontinua halo atake no dezmantela metin husi liña ba liña, ho nune’e iha minutu 29 Flaviano Alves hetan oportunidade di’ak hodi marka golu bonitu husi parte karuk ne’ebé utiliza nia ain karuk, bola tama liu rede Caesardante halo guarda matan malahuk no muda rezultadu ba 2-3.
Boa Sorte iha ambisaun boot hakarak halo empata jogu ne’e, maibé Caesardante organiza an halo jogu sai bonitu no metin iha liña hotu-hotu, nune’e susar boot ba Boa Sorte atu halo empata.
“Alexandre da Cruz” mak naran ne’ebé torpida hakilar iha segunda parte. Nia salva bolada krusial barak, inklui 1×1 hasoru Flaviano Alves iha minutu 29 bainhira skore sei 3-2. Sein defeza ne’e, jogu remata tiha ona.
“Joga, joga, joga” Alexandre dehan ba nia kolega sira iha kampu laran.
Caeradante hatudu katak futsal la’ós jogu ema ida-nian de’it. Alexandre da Cruz taka jogu ikus ho golu husi nia área rasik ba rede mamuk 4-2. Golu haat (4) mai husi autór tolu, maske laiha hat-rick.
Laiha drama individuál, maibé iha drama koletivu. Caeradante hatudu ba Timor-Leste tomak katak ekipa ne’ebé defende hamutuk, manán hamutuk. Ho rezultadu ne’e, sira hakat ba jogu daruak. Jogu tuir mai hasoru ekipa seluk sei teste loloos sira-nia moru proetsaun ne’e forte no metin duni ka lae.
Jogu termina vitória prega metin ba Caesardante no Boa Sorte hela ho derrota hodi hein jogu seluk tuir mai.
Jornalista : Hortêncio Sanchez
Editór : Cancio Ximenes
