OEKUSI, 29 Maiu 2026 (TATOLI) – Komandante Polísia Nasionál Timor-Leste (PNTL) iha Rejiaun Administrativa Espesiál Oekusi Ambeno (RAEOA), Superentendente Xefe Polísia, Nicolau Francelino da Costa, fó-sai katak, primeiru motorizada lakon iha fulan inisíu fulan-Maiu 2026 ne’e, parte komandu liuhusi seksaun investigasaun kriminál sei enkamiña ba iha Ministériu Públiku (MP) hodi kontinua prosesa judisiál.
“Kazu ne’e agora daudaun iha investigasaun kriminál, nia prosesu la’o hela, sei kontinua promove ba Ministériu Públiku, tanba kazu sériu,” Komandante Nicolau informa ba Ajénsia Tatoli,I.P iha Oekusi, ohin.
Notísia relevante:Última hora: Primeira motorizada lakon iha Oekusi, PNTL identifika ona ho autór
Autoridade polisiál ne’e hateten, Komandu PNTL Oekusi, prosede ona enkontru koordenasaun ho ekipa konjunta sira, komposta husi PNTL rasik, Serbisu Nasionál Intelejénsia (SNI) no serbisu J2, ho orientasaun ida katak, sei atribui tarefa serbisu, atu halo movimentu másimu ho forsa destakadu sira iha Oekusi, atu halo prevensaun no hasa’e vizilánsia maka’as liu tan, atu evita aktu husi pesoál ka grupu ne’ebé tenta hakarak atu prátika atitude sira hanesan foti sasan sein koñesimentu ka foti subar.
Entretantu, antes ne’e, na’in motorizada, Domingos Poto, rekomenda ba Komandu PNTL atu loke prosesu tuir lei, nune’e iha futuru labele akontese tan iha rejiaun Oekusi.
“Ha’u rekomenda ba parte PNTL, ha’u hakarak loke prosesu ba autór, atu labele akontese tan iha Oekusi, tanba uluk kedas nunka lakon. Agora hetan ona, ami agradese ba PNTL tanba hetan ona ha’u-nia motorizada,” nia hateten iha nia rezidénsia bairru Masin, sesta ohin.
Notísia relevante:Atensaun! ‘Liman-naruk’ hahú ona iha Oekusi, PNTL rejista kazu primeiru motorizada lakon
Entretantu, kronolojia akontesimentu motorizada lakon iha loron sábadu madrugada 02 Maiu 2026 kuaze tuku 03:00 dadersan, motorizada ho koor metan tipu Revo Fit karboratór ho xapa matrikula, OE.4160 ne’ebé para hela iha uma oin, iha bairru Masin aldeia Sanane suku Costa sub-rejiaun Pante Makasar.
Jornalista: Abílio Elo Nini
Editór: Rafael Ximenes de A. Belo
