DILI, 30 Maiu 2026 (TATOLI)—Kalan mai neineik, hafalun lalehan ho nakukun. Maibé, iha kampu matak (verde) nia klaran, naroman estádiu nian fó roman nafatin ba jogadór sira hodi luta ba sira-nia objetivu vitória.
Naroman hanesan roman esperansa nian. Klube sira laran-metin atu sira-nia esperansa bele konkistadu, maibé la’ós hotu-hotu bele atinje ida-ne’e. Iha Sábadu ne’e, husi tuku 18:20-21:04 Otl, iha Estádiu Munisipál Dili, akipa rua, Hibers Dili FC tantu Académica FC, iha esperansa boot hakarak hadau manán maibé destinu lahanesan. Balun tenke manán no balun tenke hela.
Esperansa ksolok nian monu ba Hibers Dili FC. Iha jogu minutu 90 ne’e, Hibers liki klube Académika husi Universidade Nasionál Timor-Lorosa’e (UNTL) ne’e monu dook demais ho skor 3-0 liuhusi jogu kontinuasaun segunda divizaun Liga Futeból Timor-Leste (LFTL) époka 2026.
Jogu ne’ebé dirije husi árbitru, inisia ho lansa kontra no atake malu tuir tékniku no abilidade ne’ebé iha. Ekipa rua hotu-hotu forte. Laiha ida hatudu sira-nia fraku. Académica ho tátika ofensiva atu hetan oportunidade hodi rezulta golu maibé ladauk iha kondisaun. Hibers la fó espasu. Blokeia metin nia adversáriu.
Husi Hibers nia defensivu, lori sira hetan uluk oportunidade. Iha minutu 39, jogadór Albert Tefa husi Hibers lansa golu ba dahuluk liuhusi xuta maka’as ba sorin karuk halo guarda rede adversáriu falla antesipa. Rede nakles luan. Luta ida-ne’e lori Hibers lidera uluk skor 1-0 .
Académica haree ida-ne’e la’ós buat baibain. Nia tenta responde susesu Hibers nian, maibé laiha oportunidade nafatin tanba defeza Hibers hanesan morru ne’ebé satan metin laloran nia siak. Husi tribun leten adeptu sira entusiaz asiste jogu atrativu ne’e. Sira idaidak haklalak suporta sira-nia klube estimadu.
Tempu mós la’o daudaun. La sente, minutu 45 ona. Jogu primeira parte terminada ho skor 1-0.
Iha segunda parte, Académica kontinua duni nia esperansa maibé seidauk másimu. Husi Hibers nia parte, mós la fó ulun ba nia adversáriu. Ba sira (Hibers), skor atuál seidauk seguru. Sira luta nafatin atu hasa’e liután skor hodi hadook an husi zona perigu.
Sira (Hibers) fiar ba sira-nia esperansa. Manán mak esperansa únika. Tebes. Esperansa ne’e la bosok. Iha minutu 58, Cristovão de Carvalho husi Hibers fura tan baliza sai 2-0. Nia haree guarda rede dook uitoan husi nia pozisaun, nia la hanoin dala-rua, nia liki bola daudaun ho ain karuk bola semo aas besik tiha lampu iluminasaun hafoin tun borus ba rede iha baliza nia leet. Pdaaak. Rede nakles. Bola golu.
Golu ida-ne’e halo Académica lakon esperansa liután. Sira sai pasivu. Ho sira-nia dezesperadu ne’e, sira lakon tiha espíritu atu kontrola bola ho di’ak. Husi minutu ba minutu, Hibers sempre hadau bola husi sira ho fasilmente. Iha minutu 70, Ananias Rae puxa tan golu ida hodi kompleta ba 3-0. Golu ida-ne’e golu ikus nian hodi fó vitória ba ekipa Hibers husi Taibessi ne’e.
Hibers rekolla ona pontu haat iha tabela klasifikasaun. Enkuantu, Académica iha jogu primeiru kontra AC Mamura derrota ho 2-1. To’o agora seidauk akomula pontu ruma.
Jornalista: Hortêncio Sanchez
Editór: Xisto Freitas da Piedade
