DILI, 31 Maiu 2026 (TATOLI)—AD Santo António fila bá uma ho pontu tolu (3) hafoin manán Vila Ataúru ho skor 1-0, liuhusi Silveiro Garcia nia xutu ho ain loos iha minutu 35.
Jogu hahú ho presaun maka’as husi Vila Ataúru. Ho apoiu adeptu, sira domina bola no kria oportunidade barak liuhusi liña klaran. Santo António nia defeza serbisu maka’as hodi taka dalan no Guarda-rede mós salva ekipa husi golu.
Ema barak hanoin Santo António sei monu, maibé lae. Iha minutu 35, momentu ida mudansa ba sira (Santo António). Garcia iha área penalidade, ho espasu ki’ik de’it, nia fila an, hasees defeza ida, no xutu kruzadu maka’as ho ain loos, bola borus kedas liubá rede laran. Golu. Skor nakfilak ba 1-0.
Jogu kontinua la’o. Husi minutu ba minutu, kontra-atake maka’as liután, maibé la rezulta golu to’o minutu jogu primeira parte nian terminadu ho rezultadu 1-0.
Tama bá segunda parte, Vila Ataúru dudu ekipa tomak bá-oin atu hadau manán. Sira halo halo atake hamutuk hitu (7), xutu haat (4) ba baliza, hetan eskanteiu lima (5), maibé morru-berlin Santu António nian taka metin hodi blokeia ofensivu ne’e.
Santu António mós iha oportunidade atu aumenta tan golu iha minutu 78 liuhusi Garcia rasik, más oportunidade ne’e la fó rezultadu di’ak. To’o apitu ikus, skor la muda. AD Santu António hela ho 1-0.
Husi vitória ne’e prega metin pontu tolu (3) ba Santu António husi jogu dala ida no Ataúru mantein ho zero basá iha jogu primeiru lakon ho FIEL ho skor 0-1, nune’e iha jogu segundu sai nafatin sorte aat ba Ataúru tanba falla rekolla pontu.
Jornalista: Hortêncio Sanchez
Editór: Xisto Freitas da Piedade
