DILI, 02 Juñu 2026 (TATOLI) – Prezidente Autoridade Nasionál Petróleu (ANP), Gualdino do Carmo da Silva, informa katak prosesu sízmiku ba mina no gás iha kosta súl, ne’ebé halo husi empreza Eni hatudu rezultadu pozitivu, no iha etapa tuirmai hakat ba perfurasaun.
“Peskiza sira hotu semana ida-ne’e to’o semana oin ramata, sira bele fila ona. Hakarak atu fó hatene ba públiku katak levantamentu dadús sízmiku ba dimensaun tolu (3D) no dimensaun rua (2D) ne’ebé hala’o iha fulan kotuk iha tasi parte kosta súl besik Projetu Greater Sunrise nia operasaun la’o di’ak, rezultadu susesu tebes. Ita bele dehan mós katak sira prepara ona atu avansa ba halo perfurasaun iha tinan oin”, Gualdino adianta.
Durante atividade sízmika, buat ne’ebé ANP observa mak períodu levantamentu iha tasi Timór, iha mós prezensa husi Autoridade Marítima Nasionál (AMN), nomós husi Ministériu Agrikultura, Pekuária, Peska no Floresta (MAPPF).
“Ami mós hakarak partilla katak durante operasaun, levantamentu dadus ne’e, ita hetan mós ró peska ilegál husi nasaun seluk ne’ebé mai tama iha ita-nia área kontratu no konsege halo alarma ba sira no deteta instalasaun Fishing Aggregating Device (FAD) rua ne’ebé peskadór ilegál sira instala iha tasi-laran. Ita hasai tiha, lori mai tau iha lixeiru Tíbar”, nia dehan.
Lembra katak, iha loron 10 Abríl 2026, ANP hamutuk ho Autoridade Marítima Nasionál (AMN) no empreza Eni hanesan operadór fahe kontratu produsaun TL-SO-22-23, ne’ebé asina iha 2023 no mobiliza ekipamentu ró sízmiku nian bá kosta súl.
Prezidente ANP fó énfaze katak ida-ne’e kompromisu dahuluk empreza nian atu halo peskiza sízmiku ba 2D kilómetru 60 no peskiza ba 3D 1.500 kilómentru kuadradu, ne’ebé nesesita tempu loron 42.
Iha 2023, ANP reprezenta Ministériu Petróleu no Rekursu Minerál (MPRM) asina Kontratu Fahe Produsaun (KFP) TL-SO-22-23 ho Eni Timor 22-23 B.V.
Ida-ne’e nu’udar subsidiáriu ida husi Eni Itália ne’ebe inkorpora tuir lei Olanda, iha loron 14 fulan-Dezembru tinan-2023. KFP ne’e rasik kobre área 4032-221 kilómetru kuadradu, no lokaliza iha parte súl Timor-Leste nian besik ba kampu Greater Sunrise no mós kampu Chuditch.
Bloku ida ne’e rasik sai hanesan bloku ida entre bloku 18 ne’ebé Governu Timor-Leste fó sai liuhusi Lisensiamentu Segundu Ronda tinan 2019/2022.
Notísia relevante: Empreza Eni hahú mobiliza ekipamentu hodi halo estudu sísmiku
Jornalista: Arminda Fonseca
Editora: Maria Auxiliadora
