DILI, 05 Juñu 2026 (TATOLI)—Governu liuhusi Ministériu Komérsiu Indústria organiza feira oseana ba grupu vendedór na’in-60 hodi faan produtu artezanatu no kulinária iha ámbitu selebrasaun loron nasionál oseanu (tasi).
Prezidente Repúblika, José Ramos-Horta, halo abertura ba Feira Oseana ne’e hafoin hamutuk ho entidade Governantes sira seluk, halo ramata kompetisaun karavana iha jardin Largo de Lecidere.
Hafoin vizita tenda espozisaun husi eskola Kafé nian kona-ba resiklajen atmosfera, Primeiru-Ministru, Kay Rala Xanana Gusmão, husu ba eskola sira aplika kriatividade iha prosesu aprendizajan no apresia ho kriatividade husi estudante sira-ne’e tanba bele transforma lixu ba obra resiklajen.
“Estudante sira-ne’e kriativu tebes no sira halo obra ne’e tuir sira-nia imajinasaun rasik kona-ba tasi no atmosfera. Obra sira-ne’e mesak kapaas de’it no refleta mensajen kona-ba ambiente,” Xefe Governu ne’e hateten ba jornalista sira iha Jardin Largo de Lecidere, ohin..
Tanba ne’e, Primeiru-Ministru ne;e husu ba eskola hotu-hotu atu aplika atividade kriativu iha sira-nia aprendizajen, nune’e bele konserva ambiente ho di’ak no minimiza lixu.
Iha biban ne’e, Ministru Komérsiu Indústria, Nino Pereira, hateten atividade feira ne’e fó biban ba grupu negosiante hamuruk 60 ne’e hodi hetan rendimentu durante loron tolu iha feira oseana ne’e.
“Grupu sira-ne’e mai husi munisípiu ne’ebé besik hanesan husi Manatutu, Aileu, Líkisa no grupu hirak ne’ebé halo parséria ho MKI,” nia dehan.
Governante ne’e dehan, orsamentu ne’ebé Governu uza ba eventu feira oseana ne’e hamutuk rihun $50 no grupu sira-ne’e faan produtu artezanatu no kulinária.
Prezidente grupu Kreatividade Timor-Leste, Constancio Neno, hateten feira oseana ida-ne’e fó oportunidade ba nia grupu atu faan produtu resiklajen ne’ebé sira prodús husi lixu (masa no sakola).
“Iha ne’e ami transforma lixu massa no sakola sai ba ai-funan ida-ne’ebé ho kós oioin. Prosesu prodús ne’e durante semana ida’ Entaun, kada produtu, ami faan presu hahú husi $2 ba leten,” nia dehan.
Nia hatutan, inisiativa ida-ne’e hahú kedas iha tinan 2023 no hetan rekoñesidu husi Governu, ho ninia objetivu atu promove obra resiklajen ka tranforma lixu ba obra ruma hodi hamenus lixu sira-ne’ebé soe arbiru.
Notísia Relevante: Ramos-Horta konsidera Loron Nasionál Oseanu atu integra konservasaun ambiente-tasi moos
Jornalista : Alexandra da Costa
Editór : Cancio Ximenes
