OEKUSI, 08 Juñu 2026 (TATOLI) – Empreza Brilliant International Holdings Limited, husi Honkong, hakarak investe iha Rejiaun Administrativa Espesiál Oekusi Ambeno (RAEOA) ba área rekursu naturál liliu iha área minerál.
Jestór Empreza Brilliant International Holdings Limited, Deng Zhou, informa, objetivu husi inisiativa atu halo investimentu iha Oekusi, nu’udar kooperasaun husi Governu Timor-Leste.
“Ami mai iha Timor-Leste, hasoru ona Primeiru-Ministru, hodi informa mai ami katak, Oekusi hanesan fatin istória ba Timor-Leste, tanba ne’e ami mai atu esplora no investe iha Timor-Leste, husi ne’e ita-nia amizade sei hahú, entaun ami sei investe ba rekursu naturál iha área minerál iha Oekusi nu’udar rai-ketan ida husi Timor-Leste,” nia hateten bainhira fahe apoia materiál eskola nian ba estudante sira iha EBF Maquelba.
Tuir nia, materiál ne’ebé empreza Brilliant Internationál Holdings Limited oferese ba Eskola Bázika Filiál (EBF) Maquelab maka hanesan, régua, livru, kadernu, lápis no lapijeira, pasta no seluktan, inklui material desportivu sira, hanesan farda, bola, no seluktan.
“Ha’u hakarak informa ba ita hotu katak, rekursu ne’ebé di’ak liu la’ós osan de’it no la’ós minerál no buat seluk, maibé rekursu primeiru liu maka ema, tuur iha eskola tanba eskola maka hanesan futuru ba nasaun, entaun ohin ami mai oferese hele apoia ba alin estudante sira, atu kompleta imi-nia nesesidade uza ba eskola ne’e,” nia afirma.
Notísia relevante:Xefe Governu apresia atividade prospesaun no peskiza ba rekursu minerál iha Oekusi
Prezidente Autoridade RAEOA, Régio da Cruz Salu, hateten, empreza investidór boot ida-ne’e, antes mai to’o Oekusi, sira enkontru dahuluk ona Primeiru-Ministru, Kay Rala Xanana Gusmão, nu’udar entidade tuteladu RAEOA.
“Kompañia ne’e nu’udar bainaka husi Governu, Primeiru-Ministru mak haruka sira, atu mai haree potensialidade Oekusi, atu halo investimentu ida-ne’e, ne’ebé ohin ita enkontru ho sira, atu ko’alia estratéjia saida mak atu prepara ba futuru, tanba foin dahuluk mai Oekusi, atu observa fatin sira-ne’e, no tuir planu atu investe iha rekursu naturál liliu mineral inklui rekursu seluk, maibé ida-ne’e sei iha faze diskusaun, ne’e maka sira lori hela apoia hodi oferese ba alin estudante sira iha Maquelab,” nia hateten.
Notísia relevante:Autoridade RAEOA rekomenda halo tuir kultura molok halo peskiza ba rekursu minerál
Observasaun jornalista Ajénsia Tatoli,I.P, nota, empreza Brilliant International Holdings Limited, to’o Aeroportu Internasionál Rota do Sândalo Oekusi ho aviaun Jet prikada, iha oras tuku 11:00 dadersan, hodi fahe ba ekipa rua.
Ekipa ida, enkontru ho Prezidente Autoridade RAEOA no ekipa ida seluk kontinua vizita suku Bene-Ufe, hodi observa fatin estratéjiku ba futuru halo investimentu.
Jornalista: Abílio Elo Nini
Editór: Rafael Ximenes de A. Belo
