BOBONARU, 08 Juñu 2026 (TATOLI) – Sentru Saúde Komunitária (SSK) Postu Administrativu Balibo, Munisípiu Bobonaru presiza médiku na’in-lima no parteira na’in-lima atu koloka ba postu saúde Batugade, Kowa, Leohitu, Leolima no postu saúde Sanirin hodi mellora atendimentu ba komunidade ne’ebé moras no inan isin-rua atu partu.
Xefe SSK Balibo, Zacarias Fernandes, informa, daudaun ne’e postu saúde lima referida enfrenta problema menus rekursu umanu.
Notísia relevante: Sentru saúde Balibo laiha oksijéniu ne’e “Hoax”
“Ami presiza médiku na’in-lima depois parteira mós hanesan, postu saúde sira ne’e enfermeiru sira kompletu iha postu saúde inklui cleaner, maibé menus mak médiku no parteira,” nia informa ba Jornalista sira, iha kna’ar-fatin, segunda ne’e.
Alende ne’e, iha SSK Balibo mós enfrenta problema konabá espasu atendimentu la sufisiente.
“Ami-nia programa ida rua hamutuk iha fatin ida de’it, ne’ebé rekomenda ba futuru nivel altu atu bele mai hare fatin sira ne’e, tanba fatin atendimentu pasiente ne’e ketak-ketak, purezemplu maternidade ketak, kurativu kanek ketak, maibé ami provizóriu hela, fatin administrasaun mós sei hamutuk hela hanesan ne’e,” nia hateten.
Maske enfrenta problema referida, xefe sentru saude husu ba komunidade sira liu-liu inan-isin rua atu hakbesik-an mai SSK Balibo hodi halo konsulta Ante Natal Care (ANC) hodi bele hatene kondisaun bebé no inan, nune’e bele hamenus kazu mortalidade inan no oan.
Enkuantu durante ne’e ambulansia multi-funsaun SSK Balibo sempre halo atendimentu ba pasiente ne’ebé moras iha postu saúde hodi refere mai SSK no Hospitál Referál Maliana.
Notisía relevante: IRA no moras kulit rejista aas iha sentru saúde Balibo
Jornalista:Sergio da Cruz
Editór: Evaristo Soares Martins
