BOBONARU, 12 marsu 2025 (TATOLI)—Xefe Sentru Saúde Komunitária (SSK) postu administrativu balibo, munisípiu Bobonaru, Zacarias Fernandes, klarifika durante ne’e SSK Balibo seidauk enfrenta problema laiha oksijéniu, tanba bainhira menus ne’e Institutu Nasionál Farmásia Produtu Mediku (INFPM) rejionál Maliana responde kedas.
Notísia Relevante: Estoke ai-moruk esensiál iha Sentru Saúde Bobonaro sufisiente
Xefe Sentru Saúde ne’e sente triste no konsidera informasaun ne’ebé espalla iha públiku liuhusi mída balun dehan Sentru Saúde Balibo durante ne’e efrenta problema laiha oksijéniu ne’e Hoax ka la loos, tanba realidade estoke oksijéniu sufisiente hela atu halo atendementu ba pasiente ne’ebé moras liuliu ba kazu emerjénsia sira.
Tuir nia, durante ne’e atendementu saúde loro-loron iha suku Cova, Leo-hitu, Batugade, Sanirin, Balibo villa ho suku Leo-Lima la’o normál tanba seidauk simu krítika no lamentasaun husi komunidade kona-ba fasilidade no medikamentu iha SSK Balibo laiha.
“Informasaun ida iha segunda espalla iha mídia dehan katak oksijéniu iha Sentru Saúde Balibo laiha ne’e, ha’u hanoin ne’e la loos tanba oksijéniu iha Balibo ne’e ami iha estoke 10 ne’ebé kompostu husi boot tolu (3) no kiik (7). Depois iha tan oksijéniu elétriku ida agora dadauk ami uza hela, ne’ebé ami laiha fallansu kona-ba oksijéniu. Atendementu mós la’o normál hela durante ne’e laiha fallansu,” Nia informa ba jornalista sira iha Maliana, kuarta ne’e
Kona-ba transporte, nia rekoñese SSK Balibo iha fulan hirak liubá hasoru problema duni, tanba karreta ambulánsia unidade tolu kondisaun ladi’ak atu halo operasaun tula pasiente.
“Iha karreta ambulánsia rua, ida empresta Maliana nian ne’e mós agora aat hela, para hela iha Sentru Saúde. Iha rua mós foin lalais tula pasiente mai Maliana ninia Bomba-Mina nian mak tohar, ne’ebé agora para hela iha Servisu Saúde Munisipál (SSM). Agora, ida fali ami hadi’ak fila-fali ona, agora komesa halo operasaun,” nia dehan.
Entretantu, tuir informasaun ne’ebé Agência Tatoli rekolla iha terrenu nota katak, bainhira karreta ambulánsia Sentru Saúde Komunitária (SSK) Balibo falla ka avaria, responsavél sira koordena malu ho Servisu Saúde Munisipál Bobonaru hodi apoia karreta ambulánsia multi-funsaun atu responde imediata, nune’e bele transporta pasiente ba Sentru Saúde no Hospitál Referál Maliana.
Notísia Relevante: Postu Saúde lima iha Balibo funsiona normál
Jornalista : Sergio da Cruz
Editór : Cancio Ximenes
