DILI, 22 Juñu 2026 (TATOLI) – Hafoin Governu dekreta lutu nasionál durante loron hitu, ba falesimentu antigu Prezidente Repúblika, Francisco Guterres “Lú Olo”, Ministru Interiór, Francisco da Costa Guterres, orienta ona ba Polísia Nasionál Timor-Leste (PNTL) atu reforsa seguransa no kontrola situasaun públika durante períodu lutu, liuliu iha ámbitu kopa mundiál.
“Ita lakon ita-nia eroi boot ida ne’ebé durante ne’e fó nia-an tomak ba luta libertasaun nasionál. Daudaun kopa mundiál la’o, ha’u orienta ona parte seguransa tenke organiza didi’ak, kontrola situasaun katak adeptu sira bele haree bola, maibé labele halo barullu ka festa tanba ita iha hela lutu nasionál durante loron hitu ba ita-nia eroi ida”, governante ne’e hateten iha Ministériu Finansa, ohin.
Nia hateten katak parte seguransa prontu fó apoiu tomak ba komisaun organizadora husi serimónia sira relasiona ho translada no funerál eis-Prezidente Lú Olo.
Iha fatin hanesan, Vise-Primeiru-Ministru, Mariano Assanami Sabino, apela ba joven sira no povu timoroan tomak atu hatudu respeitu no konxiénsia durante lutu nasionál.
“Ita hotu triste tanba ita-nia líder nasionál ida lakon iha ita-nia leet. Sira ne’ebé sobrevive husi luta ne’e la barak, tanba ne’e ita husu konxiensia, fó resposta no onra glória ba ita-nia saudozu”, nia dehan.
Lutu nasionál ne’e Governu dekreta durante loron hitu iha nasaun tomak, hahú husi tuku 15h00 loraik iha loron 22 fulan-Juñu to’o meia-noite iha loron 28 fulan-Juñu, ho bandeira nasionál ne’ebé hasa’e iha meia-mastru iha edifísiu públiku sira hotu, inklui embaixada sira, konsuladu sira no reprezentasaun sira seluk Estadu nian iha rai-li’ur, nomós iha ró sira Estadu nian.
Francisco Guterres “Lú Olo” mate ho idade 71 iha Ospitál Prince Court iha Kuala Lumpur, Malázia, iha ne’ebé nia simu hela tratamentu médiku intensivu.
Moris iha Ossú, iha munisípiu Viqueque, iha loron 7 fulan-Setembru tinan 1954, nia dedika parte boot husi nia moris ba luta ba libertasaun nasionál, tanba kaer ona responsabilidade oioin iha rezisténsia durante okupasaun indonézia.
Notísia relevante: Lutu nasionál ba falesimentu antigu Prezidente Lú Olo hahú ohin
Jornalista: Arminda Fonseca
Editora: Maria Auxiliadora
