BAUKAU, 23 Juñu 2026 (TATOLI)—Programa Merendár Eskolár (PME) ne’ebé atuál implementa durante trimestrál dahuluk iha Munisípiu Baukau laiha kualidade.
Diretór Serbisu Edukasaun Munisipál Baukau, Afonso dos Santos da Costa, esplika grupu komutáriu ne’ebé nu’udár implementadór Programa Merenda Eskolár iha faze dahuluk inísiu tinan-ne’e fornese menu ba estudante balun deteta la ijiene, hanesan modo naan karau iis no manu-tolun aat nian hanesan iha eskola Ensinu Báziku Sentrál (EBC-sigla portugeza) Katólika São Domingos Sávio Vila Antiga no Eskola Públika EBF Kaisido, Tirilolo, Baukau Vila.
“Iha faze dahuluk ne’e inspetór sira aprezenta liuliu ba modo sira, hanesan iha Eskola Primária Katólika Kaisidu naan iis no manu-tolun mak aat. Ida-ne’e mak uluk sira kestiona,” Afonso dos Santos da Costa hateten iha ninia kna’ar fatin, Vila Nova Baucau, Tersa ne’e.
Notísia relevante: ME konsidera Programa Merenda Eskolár falta monitorizasaun husi PAM
Nia relata menu sira laiha ijiene tanba fasilidade hanesan konjeladór laiha atu asegura modo hanesan naan no manu-tolun ba durasaun kle’ur nune’e fó impkatu ba kualidade hahán ne’ebé estudante sira konsome.
Edukasaun Baukau konsidera ho situsaun referida sai referénsia no nafatin halo koordenasaun ho fornesedór no grupu jestaun komunitária sira iha terrenu atu halo jestaun di’ak ba PME nune’e labele repete tan iha faze daruak to’o períodu tinan-ne’e ramata.
“Ita husu ba sira antes fornese ba labarik sira tenke haree bainhira aat ona tenke troka filafali. Ida-ne’e mak ita fó hatene ba ita-nia ekipa sira-ne’e para kuidadu sasán sira-ne’e,” Afonso akresenta.
Iha fatin seluk, Koordenadora Agrupamentu EBC Terseiru Síklu Santo António Teulale ne’ebé responsabiliza ba Programa Merenda Eskolár iha eskola Domingos Sávio Vila Antiga, Elezita Maria Cabral, rekoñese implementasaun PME faze dahuluk hamosu erru ba menu iha fulan-Fevereiru nune’e afeta ba estudante sira iha eskola Domingos Sávio Vila Antiga.
“Antes ne’e naan lori mai di’ak. Te’in tiha ona lori bá estudante sira mak akontese iis no ular,” Elezita haktuir.
Nia hateten daudaun ne’e grupu implementadór antesipa, bainhira nota no haree modo ladi’ak sempre koordena ho fornesedór hodi substitui nune’e labele repete situasaun iha faze dahuluk.
Entretantu, implementasaun Programa Merenda Eskolar iha Munisipiu Baukau ho valór orsamentu $2.788.690, fó benefísiu ba estudante 34.614 husi eskola sira kompostu pré-eskolár, ensinu báziku primeiru, segundu no terseiru síklu sira.
Jornalista: Natalino Belo
Editór: Xisto Freitas da Piedade
