DILI, 25 Juñu 2026 (TATOLI) – Áfrika-Súl asegura sira nia fatin iha ronde 32 hafoin halakon Koreia Súl iha sira nia jogu ikus Grupu A Kopa Mundiál 2026.
Maske lakon, Koreia Súl tenke hein nafatin konfirmasaun kona-ba ninia destinu iha torneiu refere hodi avanaa ba jornada 32.
Jogu Áfrika Súl hasoru Koreia Súl akontese iha Estádiu Monterrey iha Monterrey Kinta meiudia oras Timor-Leste nian. Bafana Bafana asegura vitória grasa ba golu solitáriu husi Thapelo Maseko iha segunda parte.
Rezultadu ne’e koloka Áfrika-Súl iha segundu lugar iha Grupu A ho pontu haat, tuir Méxiku, ne’ebé lidera grupu ne’e ho pontu neen. Koreia Súl iha terseiru lugar no tenke kompete nafatin ho ekipa sira ne’ebé hetan terseiru lugar hosi grupu sira seluk ba fatin ida iha ronde tuirmai.
Koreia Súl besik atu lidera iha inísiu liuhosi Kim Min-jae nia kabesa besik poste. Maibé, esforsu ne’e hetan frustrasaun hosi Aubrey Modiba.
Iha minutu oitavu, Lee Kang-in ameasa baliza súl-afrikanu. Hafoin tesi hosi parte loos, nia tiru ida ne’ebé sai dook.
Áfrika Súl hahú ameasa defeza adversária iha minutu 30. Thapelo Maseko hakat liu liña kotuk súl-koreanu nian no halo suta ida, maibé hetan blokeiu hosi Lee Gi-hyuk, hodi rezulta kantu ida.
Husi kantu, bola sai hosi área penalidade nian molok Oswin Appollis lansa suta ida ho distánsia dook. Maski nune’e, guarda rede súl-koreanu Kim Seung-gyu konsege salva bola.
Áfrika Súl hetan tan oportunidade osan-mean iha minutu 30. Thalente Mbatha lansa suta ida hosi liur área penalidade nian, ne’ebé maka hetan para hosi Kim Seung-gyu. Rebote ne’e monu ba Evidence Makgopa, maibé nia suta ba kedas ba guarda-rede súl-koreanu.
Golu ne’ebé hein kleur ona hosi Áfrika-Súl to’o ikus mai iha minutu 63. Kontra-atake ida ne’ebé konstrui ho di’ak no lalais maka remata hosi Thapelo Maseko hodi fó vantajen 1-0 ba nia ekipa.
Ho golu ida, Koreia Súl buka atu halo empata. Hong Myung-bo nia ema sira koko atu sobu defeza adversáriu liuhosi kanál atake oioin.
Iha parte seluk, Áfrika Súl hili aprosimasaun ida ne’ebé kuidadu liu hafoin lidera. Hugo Broos nia ekipa maioria defende no hein iha sira nia parte rasik.
To’o jogu ne’e remata, Koreia Súl la konsege hatama fali golu ida. Vitória ne’e dudu Áfrika Súl ba jornada 32 nu’udar segundu kampeun iha Grupu A, enkuantu Koreia Súl remata iha terseiru lugar no tenke hein rezultadu husi ekipa sira ne’ebé hetan terseiru lugar husi grupu sira seluk.
Áfrika Súl nia jogadór
Ronwen Williams, Aubrey Modiba, Mbekezeli Mbokazi, Khuliso Mudau, Ime Okon, Thalente Mbatha, Sphephelo Sithole, Oswin Appollis, Relebohile Mofokeng, Thapelo Maseko, Evidence Makgopa.
Koreia-Súl nia jogadór
Kim Seung-gyu, Lee Han-beom, Kim Min-jae, Lee Tae-seok, Seol Young-woo, Lee Gi-hyuk, Hwang In-beom, Paik Seung-ho, Hwang Hee-chan, Lee Kang-in, Oh Hyeon-gyu.
Jornalista: Hortêncio Sanchez
