Emmanuel susesu hadau pontu tolu husi DIT ho golu mihis
DILI, 21 Juñu 2026 (TATOLI)–Emmanuel FC konsege sita pontu tolu importante hafoin manán DIT FC ho rezultadu 2-1 iha jogu Liga Futeból Timor-Leste (LFTL) époka 2026, ne’ebé realiza iha Estádiu Munisipál Dili, Domingu lorokraik.
Jogu ne’e lidera husi árbitru Pedro Braga, bainhira fó orientasaun liuhusi huu apitu dahuluk iha kampu laran, jogadór sira lansa kedan kontra-atake ba malu tuir tékniku no abilide ekipa ida-idak nian oinsá bele prodús golu.
Emmanuel hahú jogu ho konfiansa. Jogadór Feliciano da Costa besik atu hetan vantajen iha minutu 10 liuhusi bola pasa husi nia kolega Celestino dos Reis nia kabesa.
Maski nune’e, oportunidade husi avansadu Feliciano ne’e hetan impedimentu husi Guarda-Rede DIT, Djingue Mossi, ne’ebé halo dezempeñu ida-ne’ebé brillante.
Notísia relevante : Emmanuel “Lulun” Porto Taibessi 5-1
Ho kontra-atake ne’ebé suli hanesan kilat musan, iha minutu 15 Jhon Lawani konsege fura rede DIT hodi muda rezultadu ba 1-0.
Iha minutu iha minutu 15 ne’e, DIT tenke sofre golu ida bainhira suta husi jogadór Lawani bainhira hetan oportunidade bola livre.
Ho golu ida, DIT hakfodak. Jogadór Emmanuel sira selebra ho kontente no konfiansa katak sei manán jogu ne’e.
Jogu la’o husi minutu ba minutu, besik ona atu termina parte dahuluk, maibé laiha golu ruma akontese vitória provizóriu hela ho Emmanuel 1-0.
Tama ba parte daruak, Emmanuel hetan presaun maka’as hosi DIT iha minutu lima dahuluk. Nune’e iha minutu 56 jogadór DIT kombina malu José Santos konsege sobu defeza Emmanuel hodi muda rezultadu ba 1-1.
Rezultadu iha mudansa, DIT halo presaun maka’as Treinadór Emmanuel Gaspar Amaral, hatán ho mudansa boot iha minutu 58 dada sai jogadór na’in-tolu dala ida, Celestino dos Reis, Domingos Lopes no Armand Beadound. Hatama fali jogadór suplente na’in-tolu. Clinton Freitas, Jonata Pereira no Rivaldo Correia.
Iha mudansa ne’e lori duni vantajen ba Emmanuel tamba iha minutu 70 jogadór suplente Rivaldo Correia konsege sobu defeza DIT hodi muda rezultadu ba 2-1 mantein to jogu termina.
Ho vitória 2-1 ne’e, Emmanuel FC prova sira nia mentalidade forte maski joga ho ema menus. Vitória ne’e sita pontu tolu no fó animu ba sira nia jigu époka 2026. DIT FC tenke serbisu maka’as liután iha jogu tuirmai.
Husi rezultadu ne’e lori Emmanuel akomula ona pontu neen husi jogu tolu manán rua no lakon ida. DIT foin akomula pontu tolu husi joga dala-tolu manán ida.
Jogadór husi DIT FC
Quingui Mossi, Zito Moreira, Tanimola Ayobami, Natalino Salsinha, Martinho Vaz, Arnaould Menkoande, Nelson Boavida, José Santos, Elvis da Silva, Kouda Mah, Feusson Vicky
Jogadór husi Emmanuel FC
Pablo de Jesus , Tomas Sarmento, Israel Wamiau, Celestino dos Reis, Mighael Adoghe, Idrissa Camara, Jimmi Mendonça, Jhon Lawani, Feliciano da Costa, Domingos Lopes, Armand Beadound.
Jornalista : Hortêncio Sanchez
Editora : Julia Chatarina
