Emmanuel “Lulun” Porto Taibessi 5-1

DILI, 14 abríl 2023 (TATOLI) – Ekipa primeira divizaun Liga Futeból Timor-Leste (LFTL) Emmanuel FC susesu iha nia jornada hodi “lulun” adversariu Porto Taibessi FC ho rezultadu 5-1.

Jogu ba ekipa rua hala’o iha Estádiu Munisipál Dili, sesta loraik ne’e hanesan jogu kontinuasaun LFTL époka 2022-2023.

Hanesan baibain jogu komesa ekipa rua lansa kedan kontra no atake ba malu tuir tekniku no abilidade ekipa ida-idak nian atu buka hatama golu.

Menutu primeiru ekipa Emmanuel hatudu kedan performe ne’ebé brillante halo ekipa Porto book aan la di’ak iha kampo laran maske adeptus Porto nian hakilar halo Estádiu ne’e atu rahun tia de’it.

Iha menutu rua nia laran bola barullu iha lina oin Porto nian jogadór Juvito Moniz (3) lansa ona golu primeiru muda rezultadu ba 1-0.

Hosi rezultadu ne’e aumenta liu tan prestasaun Emmanuel nian solidu liu tan iha kampo laran, maske nune’e Porto nafatin luta makas hodi halo empata jogu ne’e maibé defeza Emmanuel nian la fó fatin atu avansadu Porto nian tama hodi halo golu.

Biar nune’e Porto nafatin halo jogu ne’ebé ho ambisaun makas atu fura sala-sala rede Emmanuel nian maibé guarda rede konsege tenta baku sai bola ba liur no balun la kona iha alvu.

Maibé menutu ba menutu estratejia jogu komesa muda jogadór Porto Danilson Araujo (16) konsege fere duni rede Emmanuel liu hosi sutu dook ida ho kalma halo guarda rede Emmanuel la konsege salva bola tama liu ba laran muda kedan rezultadu ba 1-1 iha menutu 41.

Golu ne’e hanesan golu ikus ba ekipa rua iha menutu primeira parte tanba jogadór ekipa rua luta makas atu prodúz golu ba malu maibé la konsege.

Hakur ba segunda parte ekipa rua nafatin hatudu jogu ne’ebé furak maibé Emmanuel domina liu bola kompara ho Porto.

Ho rezultadu domina ne’e la hale de’it hanesan domina maibé fó duni rezultadu di’ak tanba iha menutu 57 jogadór Juvito marka tan golu ida muda rezultadu ba 2-1.

Golu ne’e akontese halo jogadór Porto nia mentalidade komesa tun ba-bebeik no ikus mai iha menutu 66 jogadór Emmanuel Edit Savio (10) lansa tan golu ida hatur kedan rezultadu ba 3-1.

La’os ne’e de’it maibé iha menutu 89 jogadór Frentelino dos Santos (20) halo tan golu ida muda kedan rezultadu ba 4-1.

Hosi golu hirak ne’e halo Porto Taibessi la hatudu ona jogu ne’ebé di’ak iha menutu 90 bola barullu makas iha lina oin Porto nian jogadór Porto Frederico Sila (19) la kontrola bola ho di’ak hatama rasik bola ba sira nia baliza halo auto-golu muda rezultadu ba 5-1.

Hosi golu ne’e fó vitoria metin ba Emmanuel no Porto obrigado tenke hela ho derrota.

Eskuad Emmanuel:

Carvarinho Fernandes (1), Afonso de Carvalho (2), Cristovão de Carvalho (29), Juvito Moniz (3), Sandro Quintão (14), João de Sousa (22), Luis Gusmão (17), Zenedine Lopes (6), Mario Quintão (11), Edit Savio (10).

Suplente:

Fortunato Gomes (77), Amancio Araujo (18), Carlos Soares (23), Elroi Braz (15), Frentelino dos Santos (20), Orlando Belo (21), Vidal Correia (5), Angelito Tilman (8).

Treinadór: Emilio Ribeiro

Eskuad Porto Taibessi:

Juvencio Henrique (1), Januario Pinto (5), Angiso Barbosa (12), Frederico Sila (19), Inosencio Ati (3), Edencio da Costa (13), Feliz Gama (15), Jardel Piedade (9), Lazio Piedade (77), Danilson Araujo (16), Helman Bere Asan (11).

Suplente:

Marcio das Dores (24), Claudio Araujo (4), Miguel Silva (2), Domingos Silva (20), Jerico Piedade (45), Nelvio Almeida (7), Raul Seran (21), Romer Martins (17), Derson Ulu (14), Yohanes Jehaman (10).

Treinadór: Miro Baldo Bento

Tabela klasifikasaun provijoriu primeira divizaun