DILI, 25 Juñu 2026 (TATOLI)—Primeiru-Ministru Interinu, Mariano Assanami Sabino, konvida ema hotu atu partisipa iha serimónia fúnebre maktoban antigu Prezidente Repúblika, Francisco Guterres Lú Olo, iha Sesta (26 Juñu 2026) aban, hahú sai husi ninia rezidénsia to’o Jardin dos Herois Metinaru.
Tanba ne’e, Governu liubusi reuniaun Konsellu Ministru extraordináriu aprova ona dekreta toleránsia povu ba loron aban atu fó biban ba ema hotu-hotu hodi partisipa iha prosesu fúnebre saudozu líder rezisténsia ida-ne’e.
“Ema balun hakarak hein direta iha jardin erois mós bele, hein iha dalan tuir rute ne’ebé mak iha mós di’ak,” Primeiru-Ministru Interinu informa ba jornalista sira iha Ministériu Finansa, ohin.
Iha biban ne’e, Assanami mós fó agradese ba joven sira-nia konsiénsia lahalo barullu iha situasaun dezlutu nasionál ida-ne’e maske sira barak mak gosta asiste (nonton) bola kopa mundiál no laiha festa hotu-hotu iha kondisaun hakmatek.
“Ha’u apresia tebes tanba ida-ne’e mak hatudu imi-nia respeitu ba erói sira,” nia apresia.
Enkuantu sekuénsia rute ba seremónia fúnebre maktoban saudozu Francisco Guterres Lú Olo sei realiza iha 26 Juñu 2026. Antes atu haloot mate-isin iha jardin dos herois Metinaru, sei iha vizita ba CCF Komoro, Kuarte Jerál F- FDTL, Palásiu Prezidénsia, Parlamentu Nasionál no sei lori ba misa iha igreja Katedrál.
“Saudozu sei hakoi iha tallu númeru dahuluk besik kedas ho saudozu Francisco Xavier do Amaral no saudozu Komandate Mauhuno nia sorin,” nia dehan.
Jornalista : Alexandra da Costa
Editór : Cancio Ximenes
