DILI, 29 Juñu 2026 (TATOLI)-Bankada Frente Revolusionária Timor-Leste Independente (FRETILIN) manifesta profunda gratidaun ba parte hotu ne’ebé hato’o ona kondolénsia no solidariedade ba falesimentu saudozu Francisco Guterres “Lú Olo”.
Deputada FRETILIN, Nurima Robeiro Alkatiri, hato’o deklarasaun polítika iha reuniaun plenária Parlamentu Nasionál, ohin, katak bankada agradese ba povu timoroan tomak iha rai-laran no rai-li’ur, tanba manifesta solidariedade, domin no respeitu ne’ebé hatudu ba erio nasionál no restauradór independénsia, Francisco Guterres “Lú Olo”.
“Bankada hakarak hato’o ba timoroan tomak, iha rai-laran no rai-li’ur, ami-nia profunda gratidaun ba manifestasaun estraordinária hodi hato’o solidariedade, domin, no respeitu ba ita-nia eroi nasionál no restauradór indepedénsia, Francisco Guterres Lú Olo, hahú kedas rona nian mate, durante velada iha maktoban nian rezidénsia to’o bá haloot iha Jardín dos Herois”, dehan.
Tuir nia, durante loron sira Lutu Nasional nian, Timor-Leste hatudu filafali ba mundu forsa ida husi nia identidade no valór ne’ebé moris husi luta rezisténsia.
“Ita-nia Prezidente Lú Olo nia lakon, la sente de’it husi nia família no FRETILIN. Povu tomak mós sente lakon. [Parte hothotu] halibur hamutuk ho sentimentu komún ida de’it, hodi fó respeitu, gratidaun no rekoñesimentu ba Prezidente Lú Olo”, nia hateten.
Deputada Nurima dehan espresaun solidariedade husi povu ida-ne’e la organiza husi instituisaun ruma, la determina husi protokolu ruma, la mosu tamba ema ruma mak obriga, maibé mosu naturalmente husi fuan timoroan sira-nian, hanesan forma ida atu rekoñese Lú Olo durante nia moris tomak ba pátria no povu.
Nia salienta katak Lú Olo nu’udar líder ida-ne’ebe nunka fa’an nia integridade. Maski moris no serví ho funsaun sira aas liu iha Estadu ida-ne’e, maibé la hamihis nia prinsípiu sira ne’ebé karaterístiku ba nia personalidade dezde tempu funu libertasaun nasionál nian.
Bankada FRETILIN sei la haluhan imajen vendedór ai-leba, komersiante ki’ik, portadór difisiénsia, agrikultór no sidadaun sira lubun ne’ebé presta omenajen. “Jestu simples ida-ne’e, iha signifikadu boot tebes. Husi jestu sira ne’e, fó hanoin filafali mai ita, rikusoin loloos rai ida nian la’ós rekursu materiál, maibé rikusoin loloos maka kapasidade nian povu atu pratika solidariedade, gratidaun no respeitu”, katak.
Nia hateten iha momentu ida triste no todan ida-ne’e, povu fó lisaun boot ida kona-ba buat ne’ebé importante liu ba nasaun.
“Hatudu mai ita katak, sosiedade ida forte, sei harii husi valór sira ne’ebé halibur nia povu. Hatudu mai ita katak solidariedade kontinua moris iha timoroan sira-nia leet. Hatudu katak umildade kontinua hetan rekoñesimentu. Onestidade merese hetan respeitu. Sei la haluhan sira ne’ebé dedika sira-nia vida, serví povu”, deputada Nurima hateten.
Deputada ne’e konsidera katak ida-ne’e nu’udar omenajen boot liu ba Prezidente Lú Olo, tanba povu rekoñese katak nia ema ida ne’ebé nunka utiliza podér ba benefísiu pesoál, nia konxiénsia labele negosia no nia lealdade ba povu nunka iha dúvida.
Bankada FRETILIN manifesta igualmente profundu rekoñesimentu ba instituisaun Estadu sira, Igreja Katólika no konfisaun relijiozu sira, autoridade tradisionál, veteranu ba libertasaun nasionál sira, partidu polítku, organizasaun sosiedade sivíl, organizasaun joven no feto sira nian, misaun diplomátika, parseiru dezenvolvimentu , no belun Timor-Leste nian ne’ebe hato’o ona sira-nia kondolénsia no solidariedade.
Husi jestu respeitu hatudu iha loron hirak ne’e, la’os deit dignifika memória Francisco Guterres Lú Olo, maibé dignifika mós istória luta povu timoroan nian ba liberdade no independénsia.
Nia dehan, forma di’ak liu atu kontinua fó onra ba Lú-Olo la’ós de’it lembra nia naran, maibé kontinua prátika valór sira ne’ebé orienta nia vida. “Integridade boot liu konveniensia, onestidade boot liu korrupsaun, umildade boot liu arrogánsia, serví povu boot liu interese pesoál. Hadomi pátria boot liu kualkér ambisaun. Ida-ne’e mak kompromisu ne’ebé Bankada FRETILIN renova ho povu timoroan sira”, nia afirma.
Tanba ne’e, sei kontinua defende ideia ne’ebe Lú Olo luta iha nia vida tomak, kona-ba idepedénsia nasionál, demokrásia, justisa sosiál, igualdade oportunidade, dignidade povu nian no harii nasaun ida ba serví de’it nia sidadaun sira.
Notísia relevante: Estadu haloot Saudozu Lú Olo ho dignu, povu rihun ba rihun reza ho matan-been
Jornalista: Nelson de Sousa
Editora:Maria Auxualidora
