DILI, 30 Juñu 2026 (TATOLI)—Komisaun Rekrutamentu Juíz ba Estabelesimentu Supremu Tribunál Justisa (STJ) iha Kuarta (01/07) hahú abertura konkursu aplikasaun ba rekrutamentu Juíz STJ no Tribunál Rekursu (TR).
Komisária Komisaun Rekrutamentu Juíz Supremu Tribunál Justisa, Carmelita Caetano Moniz, hateten, hafoin identifika no selesiona membru juri sira, Komisaun bá Portugal iha Juñu 2026, ho misaun serbisu hodi diskute ho Prezidente Konsellu Superiór Majistratura ho membru juri sira kona-ba regulamentu konkursu, kalendáriu konkursu no asuntu operasionál sira.
“Iha Portugal, Komisaun halo sorumutu serbisu rua, ho Prezidente Supremu Tribunál Justisa no Konsellu Superior da Majistratura Portugal. Seluk ho membru juri sira, ne’ebé mós partisipa husi Prezidente Konsellu Superiór Majistratura. Husi enkontru nível a’as sira-ne’e mosu ona koñesimentu formál ba juri internasionál ne’ebé nomeadu husi despaisu husi Señor Prezidente Konsellu Superior Majistratura Portugal no konsensualizasaun ba etapa tuir mai hodi asegura kumprimentu rigorozu ba Lei Organizasaun Judisiária no Konstituisaun,” Komissária hato’o ba Jornalista sira iha Supremu Tribunál Justisa, Kolmera, Tersa ne’e.
Komisaun Rekrutamentu Juíz Supremu Tribunál Justisa sei publika vaga iha Jornál Repúblika, hanesan avizu abertura konkursu iha loron dahuluk Jullu tinan ne’e.
Avizu ne’e sei define prazu ba aprezenta kandidatura sira, ne’ebé sei hala’o durante loron-30.
Notísia relevante : Komisaun Rekrutamentu Juíz STJ dezloka ona bá Portugal
Juri ba Komisaun Rekrutamentu ne’e mai husi Portugal ne’ebé nomea husi Konsellu Superiór Majistratura Judisiária husi Portugal rasik.
“Juri sei halo nia serbisu tuir etapa tolu mak hanesan, avaliasaun dokumentál, ne’ebé mak avaliasaun kurrikulár, ezame avaliasaun, ne’ebé inklui prova hakerek atu sukat koñesimentu no kompeténsia téknika sira, inklui entrevista profisionál, ne’ebé nia objetivu mak atu avalia fatór seluk ne’ebé apoia kandidatu sira-nia idoniedade, méritu no kualifikasaun ba hala’o knaar Juíz Konselleiru ka Juíz Dezembargadór, tuir kazu idaidak,” Carmelita akresenta.
Komisária dehan, juri internasionál ida, ne’ebé forte tebes bazeia ba kooperasaun entre instituisaun sira ne’ebé hanesan, nia objetivu mak atu salvaguarda imparsialidade másimu iha prosesu klasifikasaun kandidatu sira, promove partilla esperiénsia tékniku-sientífika sira no reforsa konfiansa públiku iha rekrutamentu kuadru superiór sira ba Tribunál Superiór sira Timor-Leste nian.
Etapa sira hotu, nia konteúdu, kritériu avaliasaun no pontuasaun iha valór sira iha ona ho detallu iha regulamentu konkursu nian, ne’ebé sei sai parte husi avizu abertura konkursu nian.
Juíz sira ne’ebé atu konkore ba vaga ne’e bazeia ba kritériu sira ne’ebé iha regulamentu konkursu nian, mai husi artigu 81.º no 82.º Lei Organizasaun Judisiária nian.
Prosesu konkursu sei ramata ho klasifikasaun finál ba kandidatu sira, ne’ebé halo mós husi juri, ne’ebé sei prodús lista klasifikasaun nian, ne’ebé sei anúnsia ba públiku no komunika diretamente ba kandidatu sira.
“Komisaun Rekrutamentu no Selesaun, hafoin simu ona lista klasifikasaun sira, ne’ebé juri sei haruka ba Konsellu Superiór Majistratura Judisiál hanesan relatóriu klasifikasaun finál ba konkurrente sira. Ida-ne’e sei sai Komisaun nia aktu ikus,” Komisária Carmelita tenik.
Hafoin n’e, Konsellu Superiór Majistratura Judisiál mak sei halo nomeasaun ba Juíz sira. Komisaun serbisu ona ba elaborasaun atu nune’e konkursu bele ramata molok tinan 2026 nia rohan.
Instalasaun Supremu Tribunál Justisa ne’e Governu nia kompeténsia, tuir Lei Organizasaun Judisiária nian, ba órgaun ida-ne’e mak sei kabe ba nia atu defini data ne’ebé instalasaun Tribunál Supremu no Tribunál Rekursu sei akontese.
Komisária iha biban ne’e garante katak prosesu selesaun ba Juíz STJ no Juiz sira ne’ebé tuur iha TR sei la’o transparante no profisionál. Konkorrente sira, liliu Juíz sira ne’ebé laiha prosesu ne’e, juri sei fó tempu loron-30 hodi halo reklamasaun.
“Tanba ne’e iha prosesu ida-ne’e Komisaun sei la hola parte direta, buat hotu-hotu sei halo husi juri sira,” nia subliña.
Nune’e mós, Komisáriu Avelino Coelho, hateten, iha faze verifikasaun dokumentu ne’e, Juri sira halo de’it iha Portugal tanba prosesu admisaun dokumentu ne’e via online.
“Konkorrente sira bele hatama ba Sentru Formasaun Jurídiku Judisiáriu mak iha sira manda iha elektrónika no sira bele hatama liuhusi juri verifika Juíz sira-nia dadus iha ne’ebá no kuandu teste eskrita mak juri foin mai,” nia hato’o.
Juri ba Komisaun Rekrutamentu Juíz STJ no TR ne’e iha na’in-tolu, ne’ebé halo serbisu iha Portugal, nune’e bainhira tama ba faze teste eskrita mak sira mai.
Komisária mós garante katak Fulan-Novembru ka Dezembru tinan ne’e Timor-Leste hahú ona instalasaun dahuluk ba STJ.
Iha biban ne’e, Komisáriu José Pedro Camões hateten, bainhira juri finaliza ona serbisu sei submete rezultadu ne’e ba Komisaun Rekrutamentu no Komisaun sei hato’o ba Parlamentu, Prezidente Repúblika inklui Konsellu Superiór Majistratura Judisiária Timor-Leste sira mak sei publika Juíz nia naran liu iha prosesu teste hodi ba tuur iha STJ no sé mak sei ba tuur iha TR hanesan Juíz Dezembargadór.
Jornalista : Natalino Costa
Editora : Julia Chatarina
