DILI, 01 Jullu 2026 (TATOLI) – Governu liuhusi desizaun konsellu ministru halo aprovasaun ba proposta ne’ebé aprezenta husi Ministru Justisa, Sérgio de Jesus Fernandes da Costa Hornai, kona-ba alterasaun dahuluk ba dekretu-lei nú. 10/2012, loron 29 fulan-Fevereiru, ne’ebé aprova karreira espesiál no estatutu guarda prizionál nian.
Objetivu hosi diploma ida-ne’e atu halo revizaun ba rejime karreira espesiál no estatutu guarda prizionál, ne’ebé vigora dezde 2012, ho objetivu atu esklarese regra sira ba promosaun karreira, valoriza guarda prizionál no reforsa efikásia sistema prizionál nian.
Ministeriu Justisa, Sérgio Hornai, hateten ohin nia hetan oportunidade hodi aprezenta proposta dekretu lei kona-ba estatutu servisu prizionál nian hodi halo alterasaun ba dekretu lei nú. 10/2012.
“Tamba ita haree katak servisu prizionál importante tebes. Kuazé tinan-sia, aleinde haree ba sira-nia servisu maibé haree mós ba balun ne’ebé atu tama ba idade reforma. Entaun Ministériu Justisa (MJ) halo kooperasaun ho KFP hodi haree mós ba razaun sirkuntánsia ba idade avansadu no balun ne’ebé seidauk hetan promosaun”, Ministru Justisa informa ba jornalista sira iha Palásiu Governu, ohin.
Governante ne’e dehan katak Ministériu Justisa (MJ) halo ona desizaun hodi inklui iha polítika lejizlativa medida promosaun ba membru prizionál na’in-100 no mós fó subsídiu ba servisu prizionál sira tanba sira hala’o servisu iha situasaun ne’ebé risku. Nia dehan, tanba ne’e, iha razaun atu halo admisaun hodi hasa’e sira-nia remunerasaun.
Ministru ne’e dehan entre mudansa prinsipál sira ne’ebé prevee iha diploma ida-ne’e mak inklui kriasaun kategoria Xefe Guarda Prizionál Prinsipál, revisaun ba regra promosaun, aumenta komplementu remuneratóriu to’o 50% hosi saláriu baze, fó direitu ba refeisaun durante turnu servisu, no mós kria rejime promosaun esepsionál bazeia ba antiguidade ba guarda prizionál sira ne’ebé mantein iha eskalaun ikus hosi sira-nia kategoria durante tinan ualu liu, desde sira kumpre rekizitu legál sira.
Alterasaun ne’e mós introdús ajustamentu ba rekrutamentu, formasaun no ezersísiu funsaun xefia sira nian.
Ho revizaun ida-ne’e, nia objetivu mak atu rekoñese méritu no dedikasaun guarda prizionál sira nian, kria kondisaun di’ak liután ba progresaun sira-nia karreira no kontribui ba hadi’a seguransa no kualidade servisu ne’ebé hatuur iha estabelesimentu prizionál nian.
Jornalista: Alexandra da Costa
Editór: Filomeno Martins
