DÍLI, 13 Jullu 2026 (TATOLI) – Embaixada Estadu Unidu Amérika iha Dili, hamutuk ho Ministériu Saúde (MS) no autoridade lokál sira iha loron 7 Jullu halo ona lansamentu treinamentu ba voluntáriu saúde komunitária iha suco Holarua, Manufahi.
Ministériu no ofisiál lokál sira espresa apresiasaun ba apoiu E.U.A. nian hodi halo servisu kuidadu saúde krítiku sira asesível liután ba inan no labarik sira iha área rurál sira.
Projetu ACHIEVE Timor-Leste ne’ebé finansia husi Estadus Unidus Amérika ne’e fó treinamentu ba voluntáriu nain 20 iha sucos lima hodi identifika preokupasaun saúde nian no hadi’a kuidadu ba inan no labarik nia saúde, nutrisaun, no moras hada’et no la hada’et sira — enkuantu Ministériu Saúde simultaneamente fó formasaun ba funsionáriu sira iha suco adisionál tolu, ne’e hatudu governu nu’udar na’in ba projetu ne’e no ninia sustentabilidade.
Serbisu hamutuk ho Governu Timor-Leste, líder munisípiu sira, no reprezentante komunidade sira, projetu ne’e hametin servisu saúde esensiál sira, apoia traballadór saúde sira iha liña-oin, no habelar divulgasaun ba komunidade iha Postu Administrativu Same to’o fulan Setembru.
Parte ida husi inisiativa globál ho durasaun tinan ualu ne’ebé implementa iha Timor-Leste husi Palladium ne’ebé parte ida husi konsórsiu lidera husi Paktu, projetu ACHIEVE ne’e reafirma Estadus Unidus Amérika nia kompromisu hodi hari’i Timor-Leste ida ne’ebé prósperu, saudável, no autosufisiente.
TATOLI
