DILI, 13 Jullu 2026 (TATOLI) –Empreza Manatuto Renewables Power S.A. (MRP) hasoru malu ho Prezidente Repúblika, José Ramos-Horta, hodi relata kona-ba preparasaun ba konstrusaun Projetu Solar Farm Manatutu ne’ebé sei hahú iha Agostu 2026.
Diretór-Ezekutivu Manatuto Renewables Power S.A., Mark G. Argar, hateten preparasaun ba projetu ne’e komesa iha tinan tolu ikus ne’e no iha tempu badak sei lansa fatuk dahuluk ba konstrusaun ninian.
“Loron ohin ami hetan oportunidade atu fó informasaun ba Prezidente kona-ba progresu Projetu Solar Farm Manatutu. Ida-ne’e nu’udar projetu importante ida ne’ebé dezenvolve durante tinan tolu no agora ami prepara atu tama ba faze konstrusaun”, Mark G. Argar hateten iha Palásiu Prezidensiál.
Tuir Mark Argar, iha enkontru ne’e, Xefe Estadu reafirma nia apoiu ba projetu ne’e tanba sei lori benefísiu boot ba nasaun, liuliu atu hamenus kustu enerjia nomós kria oportunidade serbisu ba komunidade iha Manatutu.
Nia dehan Prezidente Repúblika mós hakarak marka prezensa iha serimónia groundbreaking se iha tempu ne’ebá nia hela iha Timor-Leste. “Nu’udar onra boot ida ba ami karik Prezidente bele partisipa iha serimónia groundbreaking”, Argar dehan.
Serbisu konstrusaun dahuluk sei komesa Agostu ne’e no ramata iha Juñu 2028, ho totál orsamentu millaun $107.
Projetu ne’e nu’udar rezultadu husi parseria entre konsórsiu EDF Power Solutions (EDF ps) no ITOCHU, ne’ebé sai hanesan Independent Power Producer (IPP) liuhusi prosesu konkursu internasionál ne’ebé lansa husi Eletrisidade Timor-Leste (EDTL) iha tinan 2023 ho apoiu tékniku husi Banku Aziátiku Dezenvolvimentu (BAD).
Konsórsiu ne’e asina Power Purchase Agreement (PPA) ho EDTL iha 22 Jullu 2025 antes estabelese Manatuto Renewables Power S.A. iha Fevereiru 2026 atu implementa projetu ne’e.
Projetu ne’e sei harii iha suku Lifau, postu administrativu Laleia, munisípiu Manatutu. Sei iha kapasidade 72 MWac ba produsaun enerjia solár no sistema armazenamentu enerjia bateria (Battery Energy Storage System – BESS) ho kapasidade 36 MWh.
Ho investimentu hamutuk aproximadu millaun $107, projetu ne’e sei finansia liuhusi kapitál husi konsórsiu no empresta husi instituisaun finanseira internasionál hanesan International Finance Corporation (IFC), BAD no Japan International Cooperation Agency (JICA).
Durante tempu operasaun, projetu ida-ne’e prevee bele hamenus gastu kombustivel Estadu liu husi millaun $50 kada tinan, hasa’e utilizasaun enerjia renovavel to’o serka 30% husi produsaun eletrisidade nasionál, hamenus emisaun karbonu (CO₂) hamutuk tonelada millaun 2,5, no hamenus dependénsia Timor-Leste ba importasaun mina-rai hamutuk to’o millaun ida litru durante vida útil projetu nian.
Projetu ne’e mós espera bele kria oportunidade serbisu, garante folin eletrisidade ne’ebé estavel durante tinan 25, hametin seguransa enerjia nasionál no atrai investimentu foun ba setór enerjia renovavel.
Notísia relevante: Governu sei hasai millaun $18 husi OJE ba EDTL implementa Solár Panél iha Laleia
Jornalista: Arminda Fonseca
Editora: Maria Auxiliadora
