OEKUSI, 16 Jullu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), akompaña husi ekipa Sekretáriu Estadu Kooperativa (SEKoop), kuarta lorokraik ne’e, halo lansamentu fila rai ba to’os ektare 30 iha aldeia Maquelab suku Taiboko sub-rejiaun Pante Makasar atu kuda produtu Bafo-Kayrala husi grupu kooperativa Bok-Sufa.
Polítika ne’e halo parte ba implementasaun Programa Movimentu Empreendedorizmu Oekusi, ne’ebé bazeia ba orientasaun direita husi Primeiru-Ministru Kay Rala Xanana Gusmão, nu’udar Entidade Tuteladu Superentendente RAEOA (tuir Dekretu-Lei Nu. 14/2024 ne’ebé regula Rejiaun Espesiál).
Notísia relevante:SECoop lansa produsaun promosaun Bafo-Kayrala iha Pante Makasar
Prezidente Autoridade RAEOA, Régio da Cruz Salu, esplika katak inisiativa ne’e bazeia ba pilar boot tolu:
- Kria sentru produtividade espesializadu permanente tanba nia implementasaun liuhusi grupu kooperativa atu garante viabilidade, entermus organizasaun maibé kooperativa ona.
- Aproveita grupu kooperativa atu implementa no enkoraza polítika estratéjia kona-ba sentru dezenvolvimentu ekonómia verde no azúl iha Oekusi, tanba proridade husi Diresaun Rejionál Seguránsa Alimentár katak, suku ida tenke iha sentru produsaun produtividade espesializada ho eskala bo’ot, atu redús liña pobreza ki’ak, dependénsia importasaun no kontribui redús kazu má-nutrisaun inklui problema ekonomia família.
- Objetivu datoluk, razaun prinsipál harii sentru produsaun Bafo-Kayrala ektare 30 iha suku Taiboko tanba instrusaun husi Primeiru-Ministru ba munisípiu hothotu atu promove dezenvolvimentu produsaun prosesamentu Bafo-Kayrala tanba bele kontribui ba Programa Merenda Eskolár.
Autoridade RAEOA, akompaña husi ekipa SEKoop, kuarta lorokraik ne’e, halo lansamentu fila rai ba to’os ektare 30 iha aldeia Maquelab suku Taiboko sub-rejiaun Pante Makasar atu kuda produtu Bafo-Kayrala husi grupu kooperativa Bok-Sufa. Imajen TATOLI/Abílio Elo Nini
“Ida-ne’e maka objetivu prinsipál, ita tenke hahú husi Jullu agora, la’ós tempu udan maka foin hahú, maibé tenkE preparasaun antes tanba nia eskola ba investimentu, no polítika ne’e faz parte ba Programa Movimentu Empreendedorizmu Oekusi nian ” nia hateten iha suku Taiboko, kuarta ne’e.
Iha biban ne’e, Autoridade ne’e, apela ba tékniku estensionista suku sira promove liña koordenasaun ho tratorista sira, nune’e bele apoia agrikultór sira ba programa fila rai nian.
Tanba bainhira programa fila rai termina, Autoridade RAEOA sei konvida Entidade Tuteladu Superentendente RAEOA Primeiru-Ministru Kay Rala Xanana Gusmão hamutuk ho Sekretáriu Estadu Kooperativa (SEKoop), atu halo lansamentu kuda produtu Bafo-Kayrala ne’e.
Impaktu ba merenda eskolár no ekonómia lokál
Iha fatin hanesan, Diretór Jerál Sekretáriu Estadu Kooperativa (SEKoop), Olderico Lopes, konsidera polítika Autoridade RAEOA nu’udar programa prioridade ida husi SEKoop atu dezenvolve Bafo-Kayrala tanba ba futuru sai prioridade alimentasaun ba Programa Merenda Eskolár (Dekretu-Lei Nu. 55/2022).
“Bafo-Kayrala hanesan produtu multifunsaun ho nia benefísiu boot tebes, tanba daudaun integra ona iha menu alimentasaun eskolár, tanba tuir manuál Programa Merenda Eskolár 75% tenke mai husi produtu lokál, entaun ita tenke dezenvolve ona produtu Bafo ne’e atu promove no kuda hahú husi komunidade sira iha baze liliu grupu agrikultór sira iha kada suku, nune’e bele fa’an fali ba Governu, entaun sai rendimentu hodi kontribui ba dezenvolvientu ekonomia,” nia hateten.
Notísia relevante:SECoop lansa produsaun promosaun Bafo-Kayrala iha Pante Makasar
Xefe grupu Kooperativa Bok-Sufa iha suku Taiboko, Domingos Tefa, orgullu tanba grupu kooperativa Bok-Sufa envolve membru grupu na’in-32 komposta husi feto na’in-19 no mane 12.
Durante tinan barak ezekuta atividade prioridade tolu, maka produsaun Tais, rai no impesta osan, kuda ortikultuta no tinan ne’e sira hakarak aumenta atividade ida atu kuda Bafo-Kayrala.
“Agradese tanba produtu ne’e ami hahú dezenvolve iha 2025 hahú ho ektare 0,4, hatudu rezultadu di’ak tebtebes, ne’e maka foin dadaun ami hato’o pedidu apoia ami ba fila rai, tanba rai ami koordena ona ho autoridade lokál sira maka prepara ektare 30 atu hahú iha tinan ne’e,” nia orgullu.
Notísia relevante:SEKoop no Kooperativa 3K-T asina akordu sosa Bafo Kayrala husi produtór sira
Observasaun Jornalista Ajénsia TATOLI,I.P, partisipa iha seremónia lansamentu ne’e, mai husi Organizasaun Naun Governamentál (ONG) tantu lokál no ajénsia internasionál sira, xefe suku 20 no jestór sub-rejiaun sira inklui komunidade.
Jornalista: Abílio Elo Nini
Editór: Rafael Ximenes de A. Belo
