DILI, 17 Jullu 2026 (TATOLI)—Ministru Transporte no Komunikasaun, Miguel Gonçalves Manetelu, konsidera investimentu fibra ótika sei fó kontribuisaun ba dezenvolvimentu ekonomia no sosiál iha Timor-Leste.
Nia hateten, prezensa fibra ótika hanesan programa prioridade Governu oinsá hodi rezolve problema área konetividade internet (setór komunikasaun) ne’ebé ita hasoru.
Fibr ótika ne’e Governu sei faan ba operadór ekonómiku sira maibé atu garante kobertura internet to’o área remotas depende ba operadór ekonómiku sira mak faan ba populasaun, tamba CTL, E.P instala gratuita de’it ba instituisaun Estadu, tanba instalasaun fiu fibra ne’e kobertura ona ba torre telekomunikasaun ne’ebé estabelese iha teritórriu.
“Ita tenke iha infraestrutura rasik mak soberania dijitál, nune’e ita bele kontrola, jere ita-nia infraestrutura dijitál ne’ebé ita rasik harii,” nia dehan.
Fibra ótika iha kapasidade aas, fiar katak sei utiliza másimu husi setór ekonomia sira hanesan agrikultura, turizmu no mós setór sosial mak saude no edukasaun hodi dijitaliza sistema aprendizajen.
“Tanba ne’e mak Governu halo Investimentu boot hodi dezenvolve setor ekonomia no sosiál tenke la’o ho di’ak. Tanba ne’e la’ós infraestrutura estratéjiku maibé pilár importante ba dezenvolvimentu nasaun nian,” nia esplika.
Nia relata, bainhira estabelese ona fibra ótika Governu mós tenke prepara lei siber crime (Krime sibernétika) nian hodi asegura seguransa ba dadus importante sira liuliu dokumentu ofisiál Estadu nian, ne’ebé daudaun ne’e iha hela prosesu pareser interministeriál no organizasaun internaisonál nia laran no tempu badak sei lori ba aprezenta iha Konsellu Ministru.
“Enkuantu kona-ba starlink ne’e atu kompleta tanba fibra ótika ne’e investimentu Estadu. Garante katak ho instalasaun fibra ótika sei garante internet ne’ebé ho velosidade di’ak no lalais,” nia dehan.
Benefísiu husi fibra ótika maka atu bele garante soberánia dijitál, Governu eletróniku hodi fasilita prosesu administrasaun públiku, kontribuisaun setór ekonómia, ajuda redús rede internet ne’ebé lentu no haluan asesibilidade kobertura ba internet iha área rurál.
Jornalista : Alexandra da Costa
Editór : Cancio Ximenes
