OEKUSI, 17 Jullu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, fó-sai katak, neste momentu veíkulu Estadu sira iha Oekusi parradu tanba kombustível la sufisiente no afeta mós ba serbisu esensiál sira funsionamentu administrasaun públika nian.
Prezidente RAEOA ne’e konfirma, durante ne’e veíkulu Estadu sira parradu hafoin kombustível la sufisiente no afeta tebes ba funsionamentu administrasaun RAEOA la’o ladun di’ak.
“Períodu ida-ne’e karreta sira paradu labele la’o. Ezemplu, ha’u-nia edifísiu iha Dili, sira mós agora laiha kupon tanba seidauk reativa. Ita tenke respeita duni regra aprovizionamentu, tanba ne’e atividade esensiál balun, ne’ebé presiza atende husi meiu seluk hanesan petty cash, dalaruma diresaun sira balun, karik iha atividade urjénsia sira tenke hasai rasik sira-nia osan, atu haree funsionamentu administrasaun Governu nian labele parradu tanba de’it mina laiha no kupon laiha ba karreta Estadu sira,” Régiu da Cruz relata ba jornalista sira iha Oekusi, foin lalais ne’e.
Tanba ne’e, nia dehan, antes ne’e Autoridade RAEOA anúnsia konkursu públiku ba fornesimentu kombustível, no daudaun ne’e Serbisu Rejionál Aprovizionamentu fó sai ona rezultadu konkursu ne’e ba iha públiku.
Maibé publikasaun rezultadu konkursu ida-ne’e, bazeia ba dekretu-lei númeru 1/2025 kódigu aprovizionamentu kontratu públiku iha Artigu 138.o, sei fó biban ba konkorrente sira-ne’ebé la satisfás ho rezultadu ne’e, bele hato’o reklamasaun ka ka kontestasaun administrative. Tempu legál ba reklamasaun ne’e mak loron hitu (7), sura hahú husi loron ne’ebé públika rezultadu.
“Ne’e orsamentu RAEOA nian, agora daudaun komu anúnsia ona, tuir regra aprovizionamentu, depoisde loron hitu, tenke iha períodu kontestasaun atu prepara ba kontratu, maibé ha’u seidauk asina kontratu ne’e, maske desizaun husi painél deside no públika ona, tanba hein tan loron hitu,” nia hateten.
Tanba ne’e, nu’udar Prezidente Autoridade RAEOA orienta ona Diresaun Pátrimoniu Lojístika no aprovizionamentu, atu jere didi’ak veíkulu Estadu sira atu labele afeta ba funsionamentu administrasaun Governu nian.
“Sei to’o duni, períodu ne’ebé marka depoisde anúnsiu kompañia manán-na’in ba fornesimentu kombustível no sei selebra kontratu iha tempu-badak. Ami ko’alia ona ho Diretór Pátrimoniu Lojístika no aprovizionamentu husu sira atu haree asuntu ne’e, nune’e labele parradu iha funsionamentu serbisu ne’ebé presiza transporte atu ba serbisu iha terrenu,” nia hateten.
Notísia relevante:Publika ona Kódigu foun ba Aprovizionamentu no Kontratu Públiku
Entretantu, tuir rezultadu publikasaun manán-na’in ba fornesimentu konbustivél, ho númeru konkursu 021/SRAp/RAEOA-TL/VI/2026, husi kompañia Irmão Timor Unipesoál Lda ho valór fornesimentu kada litru ba gazoél $1.61 no gazoliña $1.48 kada litru, hodi fornese ba veíkulu Estadu 93 inklui veíkulu ne’ebé tama kategória leilaun.
Jornalista: Abílio Elo Nini
Editór: Rafael Ximenes de A. Belo
