VIKEKE, 24 Jullu 2026 (TATOLI)—Enjiñeiru Empreza Hoven II Unipessoal, Lda, Yohanes Yordan Wete, informa progresu konstrusuan estrada área Lugatoi, lokaliza iha Suku Karaubalu, Postu Vikeke Vila, Munisípiu Vikeke, daudaun ne’e atinje ona 96%.
“Progresu servisu ba obra estrada Lugatoi atinje ona pursentu 96% (hela 4%), ne’ebé ami seidauk halo hotu item sira hanesan semplot, cladding no morru protesaun parte foho nian,” Yohanes Yordan Wete ba TATOLI iha Lugatoi, Sesta ne’e.
Nia esplika obra estrada Lugatoi ne’ebé empreza atinje ona mak hanesan profile, thermomix, hanbackmeaning, scaies line concrete, geotex no gabiaun satan estrada ninin distánsia 100-resin.
“Ami-nia servisu kontratu to’o ateru de’it. Ami la tau alkatraun. Nune’e, ami-nia servisu besik konklui ona. Kona-ba nstrusaun ba estrada Lugatoi traballadór hamutuk na’in-20. Ami-nia haree ba obra ne’e la’o di’ak tebes, ne’ebé hetan kontrolu husi tékniku Ministériu Obra Públika no Ajensia Dezenvolvimetu Nasionál (AND),” nia subliña.
Yohanes dehan kontratu servisu durante tinan ida, hahú 2025, maibé liu tiha prazu nune’e empreza husu fali MOP halo estensaun servisu ne’ebé sei konklui iha fulan-Novembru 2026.
Projetu ida-ne’e ho naran “Construction Work on The Lugatoi Beloi Urban Road, lokaliza iha Munisípiu Viqueque no implementa husi kompañia HOVEN II Unipessoal, Lda, ho montante kontratu hamutuk $1.236.708,46, ho númeru kontratu SSS/043/MOP-2025, ne’ebé finansia no superviziona husi Ministériu Obra Públika, estrada nia luan metru neen resin.
Entretantu, tuir observasaun jornalista TATOLI katak estrada Lugatoi ne’ebé iha tinan hirak liubá kotuk difikulta ba komunidade sira-nia movimentu iha Munisípiu Vikeke tanba estrada referida monu, nune’e la autoriza karreta boot liuliu fuju labele asesu, maibé agora daudaun transporte boot sira hanesan fuju hahú asesu fali estrada ne’e.
Jornalista: Vitorino Lopes da Costa
Editór: Xisto Freitas da Piedade
