Presiza moderniza merkadu Atabae atu organiza negósiu hodi atrai konsumidór
BOBONARU, 29 Jullu 2026 (TATOLI) – Komunidade no negosiante iha postu administrativu Atabae, munisípiu Bobonaru, husu ba Governu atu moderniza Merkadu Atabae, liuliu hadi’a infraestrutura no organiza atividade komérsiu, tanba kondisaun merkadu atuál seidauk sufisiente atu akomoda vendedór sira no atrai konsumidór.
Komunidade Atabae, Nelson Tavares, dehan instalasaun merkadu ne’ebé iha agora ladún sufisiente, tanba uma merkadu ne’ebé Estadu harii uluk la to’o atu akomoda vendedór hotu. Tanba ne’e, bainhira basar semanál, vendedór barak sei fa’an iha tenda ki’ik sira iha dalan-ninin.
Nia akressenta katak situasaun ida-ne’e halo área merkadu ladún organiza, tanba negosiante idaidak hili fatin negosiu tuir nia hakarak.
“Ami husu Governu atu halo merkadu ida ne’ebé di’ak no furak liu. Ami hakarak muda vendedór hotu, hanesan fa’an modo, ai-fuan no ikan, atu hamutuk iha merkadu laran, para ema bele sosa ka hili sasán iha fatin ida de’it. Ne’e para ita haree merkadu organiza di’ak, tanba agora ne’e fa’an arbiru de’it”, nia informa ba Tatoli, iha Atabae, kuarta-feira ne’e.
Iha parte seluk, negosiante Filomena Perreira dehan Merkadu Atabae iha pozisaun estratéjika tanba lokaliza iha beira dalan internasionál ne’ebé liga Timor-Leste ho Indonézia. Maibé, kondisaun merkadu ne’ebé seidauk organizadu halo vizitante barak liu de’it no la tama atu kompras.
“Ami presiza Governu atu halo merkadu ida modernu no furak liu, nune’e bele atrai ema husi rai-li’ur molok hakat bá Dili”, katak.
Filomena mós argumenta bainhira atividade komérsiu hotu bele organiza iha merkadu laran, situasaun ne’e sei ajuda aumenta movimentu ekonomia lokál no fó benefísiu ba negosiante sira ne’ebé durante ne’e menus hetan konsumidór, tanba maioria sosa de’it iha dalan-ninin.
“Ne’e para ema sosa karik sosa hotu, se la’e sira dalan-ninin mak hetan osan, ami iha laran la hetan osan. Di’ak liu Governu halo fatin luan ida para ami tama hotu iha laran, fa’an ne’e rame, ema hotu-hotu presiza mai hola de’it iha ne’e, buat hotu bele la’o di’ak, karerta ho motór sira mós bele hetan osan”, nia dehan.
Notísia relevante: MKI halo estudu ba rai hodi prepara ba konstrusaun Merkadu Munisipál Bobonaru
Komunidade no negosiante sira fiar katak Governu bele konsidera pedidu ne’e hodi hadi’a Merkadu Atabae, atu sai sentru komérsiu modernu ne’ebé organiza no bele atrai konsumidór lokál no vizitante sira husi rai-li’ur.
Merkadu Atabae basar iha Sábadu, akumula mós egosiante sira husi postu administrativu Balibó inklui Loes, munisípiu Likisa.
Notísia relevante: Assanami lansa atividade hakiak ikan, manu no karau iha Balibo-Atabae
Jornalista: Sergio da Cruz
Editora: Maria Auxiliadora
