Prepara joven sira, Taur Matan Ruak apresia inisiativa Asosiasaun ELE iha Oekusi

OEKUSI, 31 Jullu 2026 (TATOLI) –  Eis-Prezidente Repúblika, Taur Matan Ruak, sesta ne’e, hala’o vizita ofisiál ba Asosiasaun Easy Learning English (ELE), hanesan sentru formasaun dalén inglés, ne’ebé lokaliza iha bairru Postusika suku Lifau sub-rejiaun Pante Makasar Rejiaun Administrativa Espesiál Oekusi Ambenu (RAEOA).

Hafoin vizita, Eis-Primeiru Ministru ne’e, orgullu tanba Asosiasaun ELE hatudu ona nia asaun ho sakrifísiu hodi prepara joven sira ba futuru, tanba ne’e nia dezafia Governu presiza fó atensaun.

“Ha’u apresia, ho imi-nia vizaun no vontade atu ajuda ita-nia alin sira. Ha’u fiar katak, neneik ou lais asosiasaun ne’e sei sai boot iha Oekusi, no sei hetan ajuda husi Governu no entidade internasionál sira, tanba ne’e ha’u fó parabéns ba ita-boot sira-nia dedikasaun no pasiénsia sakrifísiu vontade tomak,” Taur Matan Ruak, hateten iha ámbitu vizita ne’e.

“Avo Nana sei la taka matan”

Eis-Xefe Estadu ne’e fundamenta katak esforsu asosiasaun ELE integra ona ba investimentu rekursu umanu ba futuru Oekusi nian, atu kompete iha merkadu internasionál sira hanesan setór turízmu liliu serbisu iha nasaun dezenvolidu sira, tanba lian Inglés maka sai lian ofisiál mundu nian.

“Entaun ELE, nia kontribuisaun ne’e boot, tanba  ligasaun ho serbisu SEFOPE no Gabinete Sosiedade Sívil iha Primeiru-Ministru, ne’ebé tau matan ba sentru formasaun sira iha rai laran, bazeia nesesidade iha, imi bele hetan apoia husi ne’e, ha’u kontente loos tanba Avo Nana mai vizita ona, imi iha asosiasaun ida-ne’e, ha’u fiar Avo Nana sei la taka matan ba imi, tanba ida-ne’e inisiátiva di’ak no esforsa di’ak, atu prepara joven sira ba futuru,” nia afirma.

Notísia relevante:Vizita Asosiasaun ELE iha Oekusi, Xanana enkoraja foinsa’e sira kontinua aprende

Eis-Xefe Governu ne’e, hateten, preokupasaun boot iha Oekusi maka oinsá bele kaer metin (akumula) jovén sira iha rai-ketan ne’e, tanba jovén agora konsentra maioria iha kapitál Dili, tanba oportunidade iha Oekusi ladun barak. Maibé sei kria ona oportunidade hanesan Asosiasaun ELE iha Oekusi, bele prepara sira maka foin sai ba kapitál no fatin seluk atu kompete iha kampu traballu.

“Tanba ne’e  kontente loos, ha’u hakarak parabeniza imi-nia esforsa, no ha’u enkoraza alin sira, atu akompaña no aprende didi’ak, tanba asosiasaun prepara atividade barak, la’ós formasaun lian inglés de’it maibé turizmu, agrikultura no seluktan, entaun tenke ajuda kontribui para asosiasaun ne’e buras, tanba nia estatutu legál ona, ha’u fiar ho imi-nia esforsa sei sai di’akliu iha futuru, tanba ho vontade no esperiénsia iha inisiativa di’ak, no sakrifika, katak buat di’ak la monu husi lalehan, buat di’ak mai husi terus no sakrifisíu, sei imi serbisu ho badinas no sakrifika, imi sei hetan susesu iha moris futuru, maibé hahú ohin ba oin tenke hamutuk mak forte liu, entaun grupu ki’ikoan ne’e aban bairua sei sai boot no buras iha Oekusi,” nia fó hanoin.

Garante mantein kontaktu

Iha biban ne’e, Eis-Prezidente Repúblika ne’e, promete sei armoniza komunikasaun di’ak ba futuru bele tau matan mós ba nesesidade sira iha Asosiasaun ELE.

“Ita sei mantein komunikasaun di’ak, bele troka ideia, saida maka ita bele ajuda malu, tanba ha’u mós iha eskola ida ho kategória internasionál ho multi kulturál linguístika, hanorin ki’ikoan sira, bele aprende lian Inglés, Japaun, Xina, Korea, Tetun, Melayu no aprende mós lian Portugés, nia vizaun no misaun mós hanesan ho imi iha ELE, prepara joven ba futuru Timor-Leste nian,” nia hateten.

Iha biban ne’e, Prezidente Ezekutivu Asosiasaun ELE, Salamão Mesak, aprezenta katak, ezisténsia asosiasaun ELE dezde 2021 iha Metiaut Dili, maibé liuhusi prosesu sira, enfrenta dezafíu oioin, to’o 2024 muda fali ba Oekusi, no daudaun ne’e hetan ona nia legalidade estututu husi Ministériu Justisa (MJ) liuhusi Diresaun Nasionál Notariadu, ne’ebé rejista ona iha 2025.

Nia hateten, durante ne’e progama prinsipál lima maka Asosiasaun ELE introdus ona iha sentru formasaun ne’e, maka hanesan, estuda kona-ba língua Inglés ho báziku, komputadór báziku, agrikultura, ospitalidade no ikusliu maka turizmu nian.

“Ami-nia atividade lorloron maka ne’e, iha programa primeiru maka aprende lian Inglés. Ha’u kontente tanba ohin Avo Taur mai vizita ai-nia fatin, agora ami mós esforsa atu hetan komputadór, nune’e loron estuda Inglés kalan prátika komputadór maske báziku, no mós mobiliáriu hanesan meza no kadeira,” nia hateten.

Entretantu, totál formandu ne’ebé dadaun ativu hela iha Asosiasaun ELE hamutuk na’in-20 nu’udar klase tempu inteiru (fulltime) no klase parsiál (partime) na’in-lima.

Jornalista: Abílio Elo Nini

Editór: Rafael Ximenes de A. Belo