Autoridade Lokál Lela-Ufe Nítibe prefere ‘aselera’ projetu estrada antes tempu udan

OEKUSI, 06 Agostu 2026 (TATOLI) – Autoridade lokál sira iha suku Lela-Ufe, hanesan Xefe Suku Lela-Ufe, José Neno Sila, no Xefe Aldeia Kuat-Enes, Minguel Auni Oki, rekomenda ba empreza konstrutóra no na’in ba projetu iha Diresaun Rejionál Serbisu Obra Públika, Rejiaun Administrativa Espesiál Oekusi Ambeno (RAEOA), atu aselera no halaís projetu reabilitasaun estrada rurál husi Suku Taiboko to’o Lela-Ufe, nune’e iha tempu udan labele hetan fali estragu.

“Projetu estrada ne’e ezekuta kedas iha 2024 to’o agora seidauk finaliza, tanba ne’e husu ba Autoridade RAEOA tenke aselera lalais. Ami rekoñese agora asesu di’ak ona kompara ho tinan hirak kotuk, maibé projetu sei la’o ladun lais, no afeta tebes rai rahun ba komunidade sira, ohin ita haree rasik uma sira-ne’ebé besik estrada ninin rai-rahun nakonu, entaun kompañia aselera lalaís projetu ne’e,” Xefe Suku Lela-Ufe, José Neno Sila hateten, ohin.

Tuir nia observasaun, atu redús rai-rahun, presiza nahe simentu tanba saluran (bee-dalan) kontinua la’o hela, maibé nahe ho simentu mak seidauk. “Karik seidauk nahe, tempu udan agora estrada sei hetan estragu,” nia fó hanoin.

Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe

Iha fatin hanesan, Xefe Aldeia Kuat-Enes, Minguel Auni Oki, reforsa tan katak, estrada referida konstrui dezde 2024, tanba ne’e espera bele finaliza ona, nune’e bele kontinua ba nahe simentu.

“Ami orgullu tanba estrada la’ós hanesan uluk ona, uluk kuandu tempu udan ita labele liu, agora ita haree rasik rai rahun sa’e maka’as, entaun haree ba estrada di’ak ona, tenki halo metin liutan ho simentu, gasta osan ne’e dal aida de’it, labele tinan ida halo itoan, depois estraga tiha maka halo tan, ne’ebé ami husu presiza kompleta ona, tanba agora besik tempu udan, estrada bele hetan fali estragu,” nia hateten.

Notísia relevante:Abitante suku Lela-Ufe preokupa kondisaun estrada

Hatan ba rekomendasaun ne’e, Diretór Rejionál Servisu Obra Públika Oekusi, Remígio Nuno Sila, rekoñese konstrusaun reabilitasaun estrada sei on-going (la’o) hela, liliu item serbisu drainajén nian. Tanba ne’e, husi parte Obra Públika hamutuk ho tékniku sira sei enkoraza kompañia atu halais progresu servisu, tanba progresu atuál foin atinje 16%.

Nia hateten, iha 2024 Autoridade RAEOA preve ona nia verba kategória hanesan projetu emerjénsia, maibé iha 2025 impoin orsamentu hanesan Planu Asaun Anuál ba 2026 nian.

“Tanba orsamentu iha ona, kompañia mós asesu ona pagamentu balun, ha’u hanoin kompañia iha ona kbi’it atu aselera projetu ne’e, ne’ebé to’o Dezembru nia progresu tenki bo’ot, tanba labele tama dívida ba iha OJE 2027, tanba ne’e ita sei fó xamada ba kompañia atu aselera progresu servisu iha térrenu,” nia hateten.

Nia esplika, item serbisu ne’ebé kompañia finaliza mak clearing-grubbing no aterru, nune’e item serbisu ne’ebé sei kontinua ezekuta hela maka drainajén, tanba husi start point (pontu partida) ba kilometru 14, foin halo to’o kilometru 5.

“Item serbisu tuir mai mak plant-concrete (nahe simentu) maibé ita sei haree, tanba ezekusaun ba drainajén tarde ona,” nia hateten.

Notísia relevante:KAFI Oekusi aprova projetu emerjénsia 26 ho kustu millaun $36-resin

Entretantu, reabilitasaun projetu ne’e ezekuta husi kompañia Raynaldo’s Unipessoal Lda, ho distánsia kilometru 14,35, hahú husi Oétako (Suku Taiboko) to’o Huekolen (Suku Lela-Ufe, Postu Administrativu Nítibe) ho valór kontratu $393,995.01.

Jornalista: Abílio Elo Nini

Editór: Rafael Ximenes de A. Belo