OEKUSI, 07 Abríl 2025 (TATOLI) – Kondisaun estrada ne’ebé nakonu ho tahu iha aldeia Kuat-Enes ,suku Lela-Ufe, sub-rejiaun Nítibe Rejiaun Administrativa Espesiál Oekusi Ambeno (RAEOA), difikulta komunidade sira atu lori sira-nia produtu bá faan iha merkadu.
Xefe aldeia Kuat-Enes, Minguel Auni Oqui, rekomenda ba Autoridade RAEOA liuhusi Diresaun Rejionál Infraestrutura (DRI) hodi bele aterru urjente tanba afeta maka’as ba movimentu transporte inklui asesu ba postu Unidade Patrollamentu Fronteira (UPF) Noa-Ana.
Notísia relevante:Estrada kotu, difikulta komunidade Lela-Ufe lori produtu bá merkadu no asesu postu saúde
“Ami labele lori sasan hanesan ai-fuan no modo bá faan iha merkadu Oekusi-Vila. Nune’e kompañia aterru ona atu komunidade husi suku lima hanesan suku Ban-Afi, Lela-Ufe rasik, Usitaku liu bá Pássabe suku Malelat no Abani inklui asesu bá postu UPF Noa-Ana,” nia dehan iha suku Lela-Ufe, foin lalais ne’e.
Iha fatin hanesan komunidade Kuat-Enes, Mateus Neno, dehan :“Estrada ne’e dezde uluk to’o agora seidauk reabilita, ami rona katak tinan ne’e atu aterru ona, ami agradese, maibé agora seidauk hahú, ita haree kondisaun estrada ne’e afeta ba motor no karreta sira, labele liu,” nia preokuipa.
Hataan ba preokupasaun ne’e, Diretór Diresaun Rejionál Infraestrutura (DRI), Remigío Nuno Sila, rekoñese estrada iha Suku Lela-Ufe nakonu ho tahu tanba kompañia sei aterru hela iha parte tasi ibun.
“Projetu emerjénsia iha 27 daudaun ne’e hetan ona orden servisu, kompañia balu mobiliza ona materiál no mós hahú aterru no hamoos tanba ne’e ita espera iha tempu badak sei to’o mós suku Lela-Ufe, maibé ita haree tanba agora tempu udan estrada ne’ebé seidauk hetan reabilitasaun sei nakonu ho rai tahu,”
Relembra fali katak iha enkontru Konsellu Administrasaun Fundu Infraestrutura (KAFI), Rejiaun Administrativa Espesiál Oekusi Ambeno (RAEOA), liderada Prezidente Autoridade RAEOA, aprova uluk projetu emerjénsia 26 ho kustu millaun $36-resin ($36,928,720.47) ne’ebé aloka mai husi fundu infraestrutra nasionál atu ezekuta iha tinan ne’e.
Entretantu, tuir dokumentu ne’ebé Ajénsia Tatoli,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) projetu lima kona-ba reabilitasaun estrada rurál sira, ponte rua no gabiun ida, no KAFI datoluk mak sei ezekuta projetu 27 iha tinan ne’e.
Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
Jornalista: Abílio Elo Nini
Editór: Florencio Miranda Ximenes
