Manutensaun estrada Maliana-Bobonaru hahú hikas, komunidade husu reabilitasaun permanente
BOBONARU, 21 Agostu 2026 (TATOLI) – Empreza Vieramor Unipessoal Lda., hahú hikas implementasaun Projetu Emerjénsia Manutensaun Estrada no Ponte iha liña Maliana bá postu administrativu Bobonaru, munisípiu Bobonaru, hafoin serbisu ne’e para kuaze tinan ida-resin.
Serbisu ne’ebé kompañia halo daudaun inklui instalasaun gabiaun no aterru rai nu’udar preparasaun atu uza ponte foun ne’ebé konstrui ona iha área Hali-Mesak.
Motorista Manuel de Jesus fiar katak manutensaun ne’ebé hala’o atualmente bele kontinua to’o remata no Governu bele implementa mós projetu reabilitasaun estrada ho asfaltu.
Nia hatete katak kondisaun estrada ne’ebé aat kontinua sai obstákulu ba utilizadór sira, liuliu motorista no komunidade ne’ebé utiliza estrada Maliana-Bobonaru bá halo movimentu no a nesesidade loroloron
Notísia reelevante: Komunidade husu ba MOP suspensaun projetu manutensaun estrada Maliana-Bobonaru
“Ami fiar katak kompañia bele halo serbisu ida-ne’e. Governu mós tenke implementa projetu reabilitasaun estrada ho asfaltu, tanba tinan barak ona ami, povu Bobonaru, preokupa tebes ho kondisaun estrada ida-ne’e. Udan mai, dalan sira ne’e sai hanesan mota, no karreta ho motór liu bá-mai la di’ak”, Manuel de Jesus relata ba Tatoli, ohin.
Iha sorin seluk, Xefe Suku Lourba, Lino da Cruz, dehan kondisaun estrada Maliana bá Bobonaru agora grave tebes. Nia husu ba Governu atu prepara planu reabilitasaun permanente, la’ós halo aterru de’it rai, tanba bele hetan fali fali bainhira udan tun.
“Estrada husi Maliana mai Bobonaru ne’e agora grave loos. Tinan bailoro mak tau de’it rai, maibé ne’e hanesan ita gasta osan saugati de’it, tanba udan tun rai sira ne’e bee lori hotu”, nia preokupa.
Lino da Cruz hatete katak Governu presiza konsidera konstrusaun estrada ho padraun ne’ebé di’ak no dura, atu fasilita komunidade transporta produtu lokál husi área Bobonaru bá merkadu iha Maliana.
Nia aumenta katak kondisaun estrada ne’ebé aat mós bele afeta asesu komunidade bá servisu emerjénsia, inklui instalasaun saúde. “Agora ida husi Bobonaru tun bá Maliana ne’e, ema isin-rua labele sa’e karreta”, nia salienta.
Iha semana liubá, Ministru Obra Públika, Samuel Marçal, deklara katak estrada Maliana-Bobonaru tama ona prosesu finál.
Projetu Manutensaun Ponte no Estrada ne’e implementa ona iha tinan 2017, ho montante orsamentu milaun $2.060.737,42.
Notisía relevante: MOP halo levantamentu dadus topografia estrada Maliana-Bobonaru
Jornalista: Sergio da Cruz
Editora: Maria Auxiliadora
