Postu saúde Lamasi inauguradu, Komunidade sei la la’o dook tan ona
OEKUSI, 26 Agostu 2026 (TATOLI) – Uluk la’o loron ida tomak, komunidade Lamasi, sai dadeer no fila lorokraik, hodi hetan asisténsia no tratamentu saúde, iha sentru saúde Baoknana no balun ba Citrana. Maibé, agora Governu liuhusi Ministériu Saúde (MS) hakbesik ona, liuhusi inaugurasaun postu saúde Lamasi iha suku Bene-Ufe sub-rejiaun Nítibe.
Postu saúde ne’ebé inaugura husi Autoridade Rejiaun Administrativa Espesiál Oekusi Ambeno (RAEOA), foin lalais ne’e, sei benefísia uma-kain 115 ho populasaun 466 liuhusi tratamentu saúde ho distánsia besik.
“Agradese ba Nonu Governu liuhusi Ministériu Saúde no Autoridade RAEOA liuhusi servisu saúde, ne’ebé iha planu di’ak hodi konstrui postu saúde ne’e. Parabéns ba komunidade Lamsi,” nia hateten iha ámbitu seremónia inaugurasaun ne’e.
Notísia relevante:Autoridade RAEOA hatuur fatuk-inan konstrui postu saúde Lamasi iha Nítibe
Iha biban ne’e, Xefe Suku Bene-Ufe, Marcos Meni, haktuir katak inaugurasaun postu ne’e nu’udar rezultadu rekomendasaun direta komunidade nia ba Primeiru-ministru Kay Rala Xanana Gusmão iha tinan-2024, iha ámbitu vizita diálogu iha aldeia Lamasi.
Autoridade suku ne’e mós orgullu tanba durante ne’e komunidade atu halo tratamentu tenke la’o loron ida tomak mai iha sentru saúde Baoknana no balun ba Citrana, maibé tenke ba dadersan lorokraik mak fila tanba do’ok.
“Ha’u lori komunidade sira-nia agradese ba Governu, tanba uluk abitante sira iha Lamasi mak rekomenda direta iha vizita Avo Nana. Tinan kotuk iha hatuur fatuk, ohin ita hotu sasin ba nia rezultadu, ne’ebé sei fó asisténsia médika ba uma-kain 115 ho populasaun 466 mai husi bairru Lamasi foho, bairru Bi-Ele no bairru Bonen,” nia orgullu.
Notísia relevante:Autoridade RAEOA aloka rihun $85-resin harii postu saúde iha Lamasi Nítibe
Entretantu, konstrusaun postu saúde ne’e, ezekuta hosi empreza Jmelo Unipesoál Lda no nia medida 15×11 ho valór kontratu $85,881.81 ho nia durasaun servisu durante fulan-neen.
Iha seremónia inaugurasaun ne’e, reprezenta Autoridade RAEOA liuhusi Diretora Servisu Rejionál Saúde, Odete Amado Martins, akompaña ho autoridade lokál Nítibe, autoridade seguransa no parte igreja inklui populasaun suku Bene-Ufe.
Notísia relevante:Autoridade RAEOA lansa programa atendimentu saúde iha fatin izoladu 11
Jornalista: Abílio Elo Nini
Editór: Rafael Ximenes de A. Belo
