Waskita Karya presiza tan millaun $14 atu finaliza estrada Noefefan ba Oénunu

OEKUSI, 09 Agostu 2026 (TATOLI) –  Empreza Estatál Indonézia, PT. Waskita Karya, presiza tan millaun $14 hodi bele garante finalizasaun ba projetu estrada husi Ponte Noefefan suku Lifau sub-rejiaun Pante Makasar ba Oénunu suku Suni-Ufe sub-rejiaun Nítibe, tanba antes ne’e Governu liuhusi Autoridade Rejiaun Administrativa Espesiál Oekusi Ambeno (RAEOA), seidauk halo pagamentu ba kontratu anteriór ho valór millaun $23.

Notísia relevante:ADN orienta Waskita Karya sobu estrada kilómetru 9,5 iha Nítibe-Oésilo

Diretór Servisu Rejionál Obra Públika, Remígio Nuno Sila, verba millaun $14 ne’e, akumuladu ho dívida kontratu anteriór nian ho valór millaun $23 ho distánsia kilometru 11, tanba antes ne’e prosesu pagamentu foin to’o de’it 36% kompara ho progresu fíziku atinje ona 56%.

Prosesu pagamentu ne’e, relasaun ho antes ne’e, Autoridade Sesante, lideradu Rogério Tiago Lobato, ho Ajénsia Nasionál Dezenvolvimentu, Institutu Públiku (ADN,I.P) hamutuk ho Ministériu Planeiamentu no Investimentu Estratéjiku (MPIE) deside suspende automatikamente.

Maibé iha Dezembru 2025, Autoridade RAEOA atuál, lideradu husi Régio da Cruz Salu, deside no konkorda inísia fali kontratu foun ho Empreza Estatál PT.Waskita Karya hodi kontinua hikas projetu estrada husi ponte Noefefan ba Oénunu ho valór kontratu millaun $9 ho distánsia kilometru 11 maibé aumenta adisionál kilometru 3,5 hodi kompleta asfáltika iha estrada área urbana.

Tanba ne’e, Diresaun Servisu Rejionál Obra Públika koordena ona Ministériu Planeiamentu no Investimentu Estratéjiku (MPIE) atu konsidera iha proposta Orsamentu Jerál Estadu (OJE) 2027 nian.

“Iha difikuldade boot ba empreza nia dívida sei iha seidauk halo pagamentu, atu kontinua finaliza projetu ne’e, maibé Obra Públika kontinua koordena no Ministériu MPIE, tanba iha Dezembru 2025, Autoridade RAEOA selebra fali kontratu kontinuasaun, maibé presiza ba iha vistu previu iha Governu Sentrál, proposta husi Waskita Karya ita submete ona ba iha ADN hodi prosesa ba re-verifikasaun,” nia hateten ba Ajénsia TATOLI,I.P iha Oekusi, ohin.

Remígio Sila, esplika katak kona-ba vistu prevíu ne’e signifika, haree fila-fali proposta ne’e, nune’e bele hamosu fila-fali kontratu foun, kontratu selebra iha Dezembru tinan kotuk sei la vale, tan ne’e mak parte Obra Públika koordena nafatin ho Diretór Fundu Espesiál Dezenvolvimentu (FED), atu fó importánsia hodi halais prosesu ida-ne’e.

“Tanba ita hakarak atinje meta ne’ebé iha, empreza hein de’it desizaun no prosesu ne’ebé akumuladu, nune’e bele finaliza projetu tuir tarjetu ne’ebé iha,” nia afirma.

Notísia relevante:Waskita Karya hahú hikas projetu estrada Noefefan ho kustu millaun $9 ba kilometru 14,5

Nia hateten, anteriormente antes ne’e Autoridade RAEOA selebra kontratu ho PT.Waskita Karya ho valór kontratu millaun $23-resin, maibé depoisde suspende tanba la kumpre materiál seletadu baze-course, hodi define loloos prosesu padraun tuir tékniku ninian.

Entaun, nia dehan, iha fulan-Dezembru 2025, Autoridade RAEOA selebra fali kontratu foun ho valór millaun $9-resin nune’e kompañia bele kontinua servisu, tanba ne’e to’o ohin loron PT. Waskita Karya kontinua servisu tuir konkordánsia ne’ebé iha.

“Maibé depoisde iha komunikasaun ho parte empreza, Governu iha divída ba empreza, tanba progresu fiziku anteriór atinje 56% maibé pagamentu husi Governu foin to’o de’it 36%. Entaun iha tinan kotuk selebra kontratu foun ba millaun $9, labele akumula divida sira, tanba iha prosesu pagamentu la autoriza no mós bainhira prosesu dokumentu enkamiña to’o ADN verifika kontratu kaduka ona (mate),” nia esplika.

Ho razaun ida-ne’e maka inisiativa husi Diresaun Obra Públika hamutuk ho parte Fundu Espesiál Dezenvolvimentu (FED), ho hanoin ida katak, tenke prodús deliberasaun ida, tanba orsamentu hothotu kobre ona iha FED.

“Tan ne’e maka ita informa ona ba empreza PT.Waskita Karya atu prepara proposta tenki to’o millaun $14. Husi millaun $14 ne’e akumula ona ona divida sira, hodi rezolve iha orsamentu tinan oin, nune’e ita bele vistu prevíu ba prosesu pagamentu, iha futuru bele garante no asegura servisu hotu ba implementasaun projetu ne’e,” nia hateten.

Notísia relevante:Utilizasaun materiál ba konstrusaun estrada Noefefan-Oénunu la tuir BoQ

Autoridade infraestrutura ne’e, lembra katak, alokasaun orsamentu ba konstrusaun estrada Ponte Noefefan ba Oénunu iha OJE 2026 ne’e hamutuk millaun $4,4, maibé to’o trimestre datoluk ne’e, seidauk ezekuta ba prosesu pagamentu tanba sei presiza prosesu verifikasaun, nune’e viztu prevíu bele aseguradu no dokumentu dadaun ne’e iha ona ADN atu prosesu verifikasaun karik presiza kompleta tan buat balun.

Jornalista Ajénsia TATOLI, I.P esforsa atu konfirma asuntu ne’e ho Jestór Empreza PT. Waskita Karya maibé rejeita atu informasaun ba mídia tanba okupadu ho servisu seluk.

Maske nune’e, Jornalista AJÉNSIA Tatoli, I.P, tenta nafatin konfirma asuntu ne’e enjiñeiru Empreza Estatál Indonézia, PT. Waskita Karya, Gilang Kumoro, lakoi fó komentáriu.

“Saya tidak tahu. Tugas saya hanya kerja, itu saja (Ha’u la hatene. Ha’u-nia tarefa mak serbisu de’it, mak ne’e de’it,” nia hateten iha Ponte Noefefan, ohin.

Entretantu, iha loron 19 Agostu 2022 Autoridade RAEOA hahu halo lansamentu ho distánsia kilómetru 11, hanesan pakote I, hahú hosi ponte Noefefan suku Lifau, inklui suku Taiboko sub-rejiaun Pante Makasar to’o Oénunu suku Suni-Ufe sub-rejiaun Nítibe.

Projetu realibitasaun estrada nasionál ne’e, responsabiliza hosi empreza estatál Indonézia PT. Waskita Karya, ho valór kontratu millaun $23, neʼebé Autoridade RAEOA prevee hosi Orsamentu Jerál Estadu (OJE) 2022 ho durasaun serbisu fulan-18.

Maibé iha kontratu foun iha fulan-Dezembru 2025, Empreza estatál PT, Waskita Karya, hahú hikas projetu referida kustu millaun $9 hodi ezekuta ba distánsia kilometru 11 inklui projetu adisionál kilometru 3,5 atu kompleta asfáltika iha área urbana sub-rejiaun Pante Makasar vila.

Jornalista: Abílio Elo Nini

Editór: Rafael Ximenes de A. Belo