Abandona projetu, RAEOA simu karta ida husi CAC hakotu kontratu ho empreza rua
OEKUSI, 14 Setembru 2026 (TATOLI) – Autoridade Autoridade Rejiaun Administrativa Espesiál Oekusi Ambeno (RAEOA), liderada Régio da Cruz Salu, simu ona karta husi Komisaun Anti Korupsaun (CAC, sigla portugés), hodi husu atu hakotu kontratu ba kompañia lokál Tafen Kuan Unipesoál Lda ho kompañia Nasionál CP Unipesoál Lda tanba abandona projetu tinan barak ona.
Diretór Servisu Rejionál Obra Públika, Remígio Nuno Sila, informa, projetu rua ne’ebé abandona dezde 2021, hanesan konstrusaun Eskola Bázika Filiál (EBF) Quinat ezekuta husi kompañia lokál Tafen Kuan Unipesoál Lda ezekuta ho valór rihun $95,119.69 hahú implementa iha 2023 to’o ohin loron abandona ho no husik hela.
Notísia relevante:Prezidente Autoridade RAEOA vizita konstrusaun EBF Quinat abandonadu dezde 2023
Nune’e mós, projetu reabilitasaun estrada rurál iha Kusi suku Ban-Afi liga ba suku Malelat sub-rejiaun Pássabe ne’ebé ezekuta husi kompañia Nasionál CP Unipesoál Lda ho valór kontratu $784,814.50, ne’ebé implementa dezde 2021 maibé to’o ohin abandona no husik hela ho nia progresu servisu atinje 18%.
“Ita hetan karta ida husi CAC, fó hanoin ba Autoridade RAEOA katak, projetu rua ne’ebé abandonadu tinan barak ona, tenki hakotu kontratu, no kontinua hikas obra liuhusi konkursu públiku foun, tanba nia orsamentu aloka kedas iha OJE 2026 ne’e,” nia hateten ba jornalista sira iha Oekusi, ohin.
Notísia relevante:PDHJ Oekusi deskobre empreza konstrutora rua abandona projetu estrada no bee-moos iha Pássabe
Autoridade infraestrutura ne’e esplika katak, antes ne’e Autoridade RAEOA liuhusi Servisu Rejionál Obra Públika, atribui ona xamada atensaun, maibé kompañia la kumpre.
“Kontratu sira hetan, pelu-menus konsistente no komitmentu implementa tuir oráriu implementasaun, tanba iha kontratu, maibé abandona ona tempu naruk, Autoridade RAEOA mós fó ona xamada atensaun maibé kompañia rua ne’e laiha asaun no koordenasaun, entaun prosesu ne’e mós tama ona iha CAC, no husi CAC mós halo ona levantamentu dadus iha terrenu, hafoin hola desizaun atu hakotu kontratu permanente, no loke fali koutasaun liuhusi aprovizionamentu ba kompañia tolu atu konkore fali,” nia hateten.
Daudaun ne’e parte tékniku husi Diresaun Servisu Rejionál liuhusi edifikasaun no estrada, halo hela analiza ba item servisu ne’ebé kompañia seidauk ezekuta, hodi integra iha kontratu foun atu kontinua finaliza.
Notísia relevante:Abandona projetu, PA RAEOA keixa empreza konstrutora CP Unipesoál Lda ba CAC
Dadus ofisiál no alokasaun orsamentu
Konstrusaun EBF Quinat ne’e ezekuta hosi empreza Tafen Kuan Unipesoál, Lda., ho valór kontratu ofisiál hamutuk $95,119.69, ne’ebé hahu iha tinan-2023 maibé paradu no abandona to’o ohin loron.
Kompañia CP Unipesoál Lda reabilita estrada rurál hahú hosi bairru Kusi aldeia Hau-Tefo, suku Ban-Afi sub-rejiaun Nítibe liga ba suku Malelat, sub-rejiaun Pássabe ho valór kontratu hamutuk $784,814.50.
Jornalista: Abílio Elo Nini
Editór: Rafael Ximenes de A. Belo
