Prezidente Autoridade RAEOA vizita konstrusaun EBF Quinat abandonadu dezde 2023
OEKUSI, 04 Agostu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, akompaña husi Diretór Serbisu Rejionál Oekusi, Vincêncio Cono, hamutuk ho komunidade lokál, halo vizita ba konstrusaun Eskola Bázika Filiál (EBF) Quinat iha Suku Monemeko, ne’ebé mak abandona husi empreza konstrutora Tafen Kuan Unipesoál, Lda., dezde tinan-2023.
Iha vizita ne’e, Diretór Serbisu Rejionál Oekusi, Vincêncio Cono, introdús kondisaun fízika konstrusaun ne’e ba Prezidente Autoridade katak obra referida parada no abandona ona durante tinan tolu, nune’e Governu presiza foti meius lalais hodi kontinua konstrusaun atu fasilita prosesu aprendizajen labarik sira-nian iha EBF Quinat.
“Ohin ita rasik mai haree direita, konstrusaun ne’e kompañia husik hela, uluk harii iha 2023 maibé agora seidauk finaliza no abandona tan, ne’ebé ha’u sente orgullu tanba Prezidente mai haree rasik, kondisaun eskola ne’e presiza tau atensaun, tanba Governu gasta ona osan ba obra ne’e, ne’ebé parte edukasaun sei haree fila-fali nia dokumentu sira, kona-ba nia prosesu pagamentu momentu ne’e, selu ona pursentu hira,” nia hateten iha momentu vizita ne’e.
Baze legál no medida jurídika
Hodi responde ba situasaun ne’e, Autoridade RAEOA iha kbiit legál tuir Dekretu-Lei No. 10/2005 (Rejime Jurídiku Aprovizionamentu) no alterasaun sira (Decreto-Lei N.º 1/2025 de 8 de Janeiro), hodi foti asaun administrativu no jurídiku kontra empreza ne’ebé la kumpre kontratu (incumprimento do contrato).
Prezidente Autoridade RAEOA, kompromete katak sei foti meius administrativu hodi kria konkursu públiku foun atu kontinua finaliza projetu ne’e, no sei tau empreza referida iha lista metan (blacklist).
“Ita sei blacklist ba kompañia ne’ebé husik projetu ne’e, no tenke investiga tanba ne’e osan Estadu. Maibé saida mak ita sei fó solusaun, Autoridade sei anúnsia fali konkursu ida, kompañia seluk bele kontinua finaliza projetu ne’e, nune’e bele salva no garante katak, labarik sira bele aprende iha fatin ne’ebé dignu no seguru,” nia promete.
Iha kontestu jurísprudénsia, legalmente kuandu kontratante ida la kumpre obrigasaun kontratu nian:
- Sansaun Administrativa (Blacklisting): Tuir Rejime Aprovizionamentu, Komisaun Nasionál Aprovizionamentu (CNA) no Autoridade Kontratante iha podér atu rejista empreza ne’e iha Rejistu Impedimentu (Lista Metan), hodi impede nia partisipasaun iha konkursu públiku Estadu nian durante períodu fulan neen to’o tinan lima.
- Terminasaun Kontratu no Ezekusaun Garantia: Estadu iha direitu atu unilateralmente termina kontratu no ezekuta garantia/garantia ezekusaun bankaria ne’ebé fornese husi kompañia.
- Investigasaun Kriminál: Karik iha indikasaun kona-ba pagamentu adiantamentu sira lahó ezekusaun fízika korrespondente ba obra sira, Tribunál Kontas no Ministériu Públiku bele hahú prosesu investigasaun tuir Kódigu Penál Timor-Leste (espesifikamente ba krime sira Pekulatu ka Estragus ba Obras Públikas) – Artigu 293.º, Artigu 297.º, no seluktan.
Dadus ofisiál no alokasaun orsamentu
Konstrusaun EBF Quinat ne’e ezekuta hosi empreza Tafen Kuan Unipesoál, Lda., ho valór kontratu ofisiál hamutuk $95,119.69, ne’ebé hahu iha tinan-2023 maibé paradu no abandona to’o ohin loron.
Vizita ne’e alina ho politika Autoridade RAEOA nian iha setór edukasaun, ne’ebé iha orsamentu Jerál Rejiaun nian aloka subvensaun no investimentu kapitál hamutuk millaun $2-resin hodi harii eskola foun hamutuk 19 no hadi’a edifísiu eskola rua (2) iha sub-rejiaun Pante Makasár, Oesilo, Nitibe, no Passabe.
Notísia relevanteRAEOA aloka millaun $2-resin harii eskola foun 19 no hadi’a edifísiu rua
Jornalista: Abílio Elo Nini
Editór: Rafael Ximenes de A. Belo
